தமிழர்களின் பாரம்பரிய விளையாட்டான கபடி போட்டியை ஒலிம்பிக்கில் சேர்க்கும் காலம் விரைவில் வரும் என்றும் மத்திய விளையாட்டுத் துறை அமைச்சர் அனுராக் தாகூர் தெரிவித்தார்.
பாரத தேசத்தின் மாபெரும் கிராமிய விளையாட்டு திருவிழா என்ற பெருமைக்குரிய ஈஷா கிராமோத்சவம் திருவிழாவின் இறுதிப் போட்டிகள் கோவை ஈஷா யோக மையத்தில் மிக விமர்சையாக நடைபெற்றது.
ஆகஸ்ட் முதல் வாரம் தொடங்கிய விளையாட்டுப் போட்டிகளின் இறுதிப் போட்டிகள் ஆதியோகி முன்பு நடைபெற்றது. தென்னிந்திய அளவிலான வாலிபால் போட்டியில் சேலத்தைச் சேர்ந்த உத்தம சோழபுரம் அணி, அதே மாவட்டத்தைச் சேர்ந்த சித்தராசபுரம் அணியை வீழ்த்தி சாம்பியன் பட்டம் வென்றது. தென்னிந்திய அளவிலான பெண்களுக்கான த்ரோபால் போட்டியில் தமிழ்நாட்டைச் சேர்ந்த புள்ளா கவுண்டன் புதூர் அணி, கர்நாடகாவைச் சேர்ந்த மரக்கோடு அணியை வீழ்த்தி சாம்பியன் பட்டம் வென்றது.
மேலும், தமிழ்நாடு அளவில் நடந்த கபடிப் போட்டியில் ஆண்கள் பிரிவில் ஈரோடு அணி, விருதுநகர் அணியை வீழ்த்தி சாம்பியன் பட்டம் வென்றது. பெண்கள் பிரிவில் ஈரோடு அணி திண்டுக்கல் அணியை வீழ்த்தி சாம்பியன் பட்டம் வென்றது. வெற்றி பெற்ற அணி வீரர்களுக்கு, மத்திய அமைச்சர் அனுராக் தாகூர் மற்றும் சத்குரு பரிசுத் தொகை மற்றும் பாராட்டு கேடயங்கள் வழங்கி கெளரவித்தனர்.
விழாவில் சிறப்பு விருந்தினராகக் கலந்து கொண்ட மத்திய அமைச்சர் அனுராக் தாகூர் பேசுகையில், ஈஷா கிராமோத்சவம் திருவிழாவை 2004-ம் ஆண்டு முதல் ஈஷா நடத்தி வருகிறது. இன்று நடக்கும் 15-வது கிராமோத்சவ விழாவில் பங்கேற்றதைப் பெருமையாகக் கருதுகிறேன். இந்தப் போட்டிகளில் கலந்து கொண்டவர்கள் முழு நேர, தொழில்முறை விளையாட்டு வீரர்கள் கிடையாது. தினக் கூலி வேலைக்கு செல்பவர்கள், நெசவாளர்கள், மீனவர்கள், விவசாயிகள் எனப் பல விதமான வேலை செய்பவர்கள் தான் இப்போட்டியில் வீரர்களாகக் களம் கண்டு வென்றுள்ளனர். இது தான் இத்திருவிழாவின் சிறப்பு.
விளையாட்டுப் போட்டிகள் மட்டுமின்றி இங்கு 1,200 பேர் ஒன்று சேர்ந்து கும்மியாட்டத்தையும் ஆடி காட்டியுள்ளனர். இதுதவிர பல்வேறு கிராமிய நடனம் மற்றும் இசை நிகழ்ச்சிகளும் இத்திருவிழாவில் நடத்தப்பட்டுள்ளது. இதைக் காண ஆயிரக்கணக்கான மக்கள் கூடியுள்ளனர். இவை அனைத்தும் சத்குருவால் மட்டுமே சாத்தியம். விளையாட்டுப் போட்டிகள் மற்றும் கலைகளை வளர்க்கும் வித்தை அவரிடம் இருந்து கற்றுக்கொள்ளலாம் என்றார்.
மேலும், இந்தாண்டு 1,000 இடங்களில் கேலோ இந்தியா விளையாட்டு மையங்கள் தொடங்கப்பட உள்ளது. யோகா, களரி, மல்லர்கம்பம் உள்ளிட்ட 5 பாரம்பரிய கலைகளை கேலோ இந்தியா திட்டத்தில் சேர்த்துள்ளோம். இதேபோல், பாரம்பரிய விளையாட்டான கபடிப் போட்டியை ஒலிம்பிக்கில் சேர்க்கும் காலமும் கூடிய விரைவில் வரும் என்றார்.
இதைத் தொடர்ந்து சிறப்புரையாற்றிய சத்குரு, ஈஷா கிராமோத்சவம் திருவிழாவில் 25,000 கிராமங்களிலிருந்து 60,000 வீரர்கள் பங்கேற்றுள்ளனர். ஜாதி, மதம், ஆண், பெண், வயது என எல்லா வேறுபாடுகளையும் கடந்து அவர்கள் ஒற்றுமையுடன் விளையாடி உள்ளனர்.
போட்டியிட்டு வெற்றி பெறும் நோக்கத்திற்காக நாம் இந்த கிராமோத்சவத்தை நடத்தவில்லை. இதன்மூலம், இதில் பங்கெடுத்த வீரர்கள் மற்றும் பார்வையிட்ட ஆயிரக்கணக்கான மக்களின் வாழ்வில் உற்சாகத்தையும் கொண்டாட்டத்தையும் உருவாக்க இந்த விளையாட்டுப் போட்டிகளை நடத்தி உள்ளோம்.
வாழ்க்கையில் விளையாட்டு தன்மை இல்லாமல் போனால், வாழ்க்கை பெரும் சுமையாகிவிடும். குறிப்பாக, ஏழ்மை நிலையில் இருக்கும் கிராமப்புற மக்களின் வாழ்க்கை ஆனந்தமாகவும் உற்சாகமாகவும் இருக்க ஆட்டம், பாட்டம், கொண்டாட்டம் போன்ற அவசியம் என்றார்.
இந்த விழாவில், இந்திய ஹாக்கி அணியின் முன்னாள் வீரர் தன்ராஜ் பிள்ளை, நடிகர் சந்தானம் உள்ளிட்டோர் கலந்து கொண்டனர்.
