உலகக் கோப்பை கிரிக்கெட் : நியூசிலாந்து அபார வெற்றி !

உலகக் கோப்பை கிரிக்கெட் தொடரில் 99 ரன்கள் வித்தியாசத்தில் நியூசிலாந்து அணி வெற்றிப் பெற்றது.

ஒரு நாள் உலகக்கோப்பைக் கிரிக்கெட் தொடர் இந்தியாவில் நடைபெற்று வருகிறது. இதில் இன்றைய போட்டியில் நியூசிலாந்து மற்றும் நெதர்லாந்து அணிகள் ஹைதராபாத்தில் விளையாடி வருகிறது.

இதில் டாஸ் வென்ற நெதர்லாந்து அணி பந்துவீச்சைத் தேர்வுச் செய்தது. அதன் படி நியூசிலாந்து அணி முதலில் பேட்டிங் செய்தது.நியூசிலாந்து அணியின் தொடக்க வீரர்களாக டெவோன் கான்வே மற்றும் வில் யங் ஆகியோர் களமிறங்கினர்.

இவர்கள் இருவரும் இணைந்து சிறப்பாக விளையாடி வந்த நிலையில் டெவோன் கான்வே 40 பந்துகளில் 32 ரன்களுக்கு ரோலோஃப் வான் டெர் மெர்வேவின் பந்தில் ஆட்டமிழந்தார். அடுத்ததாக களமிறங்கிய ரச்சின் ரவீந்திரா 51 பந்துகளில் 51 ரன்களை எடுத்து ஆட்டமிழந்தார்.

அடுத்ததாக வில் யங் 80 பந்துகளில் 70 ரன்களை எடுத்து பால் வான் மீகெரென் பந்தில் ஆட்டமிழந்தார். அப்போது அணியின் ஸ்கோர் 184/3 ஆகா இருந்தது. அடுத்ததாக களமிறங்கிய டேரில் மிட்செல் 47 பந்துகளில் 48 ரன்களை அடித்து பால் வான் மீகெரென் பந்தில் ஆட்டமிழந்தார்.

அடுத்ததாக களமிறங்கிய டாம் லாதம் 46 பந்துகளில் அரைசதம் எடுத்து ஆர்யன் பந்தில் ஆட்டமிழந்தார். கடைசியாக நியூசிலாந்து அணி 7 விக்கெட் இழப்பிற்கு 322 ரன்களை எடுத்தது. நெதர்லாந்து அணியில் அதிகபட்சமாக பால் வான் மீகெரென், ரோலோஃப் வான் டெர் மெர்வே, ஆர்யன் ஆகியோர் தலா 2 விக்கெட்களை எடுத்தனர்.

323 ரன்கள் எடுத்தால் வெற்றி என்ற இலக்குடன் நெதர்லாந்து அணி களமிறங்கியது. நெதர்லாந்து அணியின் தொடக்க வீரர்களாக விக்ரம்ஜித் மற்றும் மாஸ் ஓ களமிறங்கினர். விக்ரம்ஜித் 12 ரன்களுக்கும் மாஸ் ஓ 16 ரன்களுக்கு ஆட்டமிழந்தனர்.

அடுத்தாக களமிறங்கிய கொலின் அக்கர்மேன் சிறப்பாக விளையாடி 73 பந்துகளில் 69 ரன்களை எடுத்து ஆட்டமிழந்தார். பின்பு களமிறங்கிய வீரர்கள் அடுத்தடுத்து ஆட்டமிழக்க 46 வது ஓவரில் 223 ரன்களுக்கு அனைத்து விக்கெட்களையும் இழந்து நெதர்லாந்து அணி ஆட்டமிழந்தது.

நியூசிலாந்து அணியில் அதிகபட்சமாக மிட்செல் சான்ட்னர் 5 விக்கெட்களையும் மாட் ஹென்றி 3 விக்கெட்களையும் வீழ்த்தினார்.

இதனால் நியூசிலாந்து அணி 99 ரன்கள் வித்தியாசத்தில் வெற்றிப் பெற்றது. இந்தப் போட்டியில் ஆட்டநாயகன் விருது 5 விக்கெட்களை எடுத்த மிட்செல் சான்ட்னருக்கு வழங்கப்பட்டது.