நெல்லையில் அருள்மிகு காந்திமதி அம்பாள் திருக்கோவிலில் காந்திமதி அம்பாள் திருக்கல்யாண திருவிழா வெகு சிறப்பாக நடைபெற்றது.
காந்திமதி அம்பாள் திருக்கோவிலில் நடைபெறும் திருவிழாக்களில் சுவாமிக்கு ஆனித் தேரோட்டமும், அம்பாளுக்கு ஐப்பசி திருகல்யாண திருவிழாவும் சிறப்பு வாய்ந்ததாகும்.
இந்த ஆண்டு ஐப்பசி திருக்கல்யாண திருவிழா கடந்த 29-ம் தேதி அம்மன் சன்னதி கொடிமரத்தில் கொடிஏற்றத்துடன் தொடங்கியது. கடந்த 10 தினங்கள் தினமும் காலை, மாலை காந்திமதி அம்பாளுக்கு அபிஷேகம் நடைபெற்றது. சிறப்பு அலங்காரத்துடன் பல்வேறு வாகனங்களில் வீதி உலா நடைபெற்றது.
இதனைத் தொடர்ந்து, கம்பாநதி காட்சி மண்டபத்தில் சுவாமி அம்பாளுக்கு காட்சி கொடுக்கும் வைபவம் நடைபெற்றது. அதிகாலை 4.00 மணிக்கு அம்மன் சன்னதியில் உள்ள ஆயிரங்கால் மண்டபத்தில் சுவாமி அம்பாள் திருக்கல்யாண வைபவம் வெகு விமரிசையாக நடைபெற்றது.
இதற்காக நெல்லை கோவிந்தராஜா் நெல்லையப்பரை ஆயிரங்கால் திருமண மண்டபத்திற்கு அழைத்து வந்தாா். மண்டப வாயிலில் நெல்லையப்பருக்கு பாதபூஜை நடைபெற்றுது. விழா மண்டபத்தில் அக்னி பிரதிஷ்டை செய்து ஹோமங்கள் நடைபெற்றன.
தொடா்ந்து, சுவாமி அம்பாள் காப்பு கட்டும் நிகழ்ச்சி, மாலை மாற்றும் வைபவமும், பாலும் பழமும் கொடுத்தல் உள்ளிட்டவை நடைபெற்றன. சுவாமி நெல்லைப்பருக்கு காந்திமதி அம்பாளை தாரைவார்த்துக்கொடுக்கும் நிகழ்ச்சி நடைபெற்றது.
சுவாமி, அம்பாள் ஆகியோருக்கு புது வஸ்திரங்கள் அணிவித்த பின்னர் திருமாங்கல்யதாரண நிகழ்ச்சி வெகு விமரிசையாக நடைபெற்றது. இன்று முதல் 3 நாட்களுக்கு அம்பாள் ஊஞ்சல் விழா நடைபெறுகிறது. அதனை தொடா்ந்து சுவாமி அம்பாள் ரிஷப வாகனத்தில் மறுவீடு பட்டினப்பிரவேசம் நடைபெறுகிறது.
திருமாங்கல்ய விழாவையொட்டி, ஆயிரக்கணக்கான பக்தர்கள் கலந்து கொண்டு சுவாமி தரிசனம் செய்தனர்.
