அயோத்தி ராமர் கோவில் திறப்பு விழாவை கொண்டாடும் வகையில் அமெரிக்கா மற்றும் கனடாவில் ஒரு மாத கால ரத யாத்திரைக்கு விஸ்வ ஹிந்து பரிஷத் அமைப்பு ஏற்பாடு செய்துள்ளது.
அயோத்தி ராமர் கோவிலில் கடந்த ஜனவரி மாதம் 22ஆம் தேதி குழந்தை ராமர் சிலை பிரதிஷ்டை செய்யப்பட்டது. இந்த விழாவை உலகம் முழுவதும் உள்ள இந்துக்கள் நேரலையில் கண்டுகளித்தனர்.
இந்நிலையில் அயோத்தி ராமர் கோவில் திறப்பு விழாவை கொண்டாடும் வகையில் அமெரிக்கா மற்றும் கனடாவில் ஒரு மாத கால ரத யாத்திரைக்கு விஸ்வ ஹிந்து பரிஷத் அமைப்பு ஏற்பாடு செய்துள்ளது.
இந்த யாத்திரை மார்ச் 25ஆம் தேதி தொடங்குகிறது. அமெரிக்காவில் உள்ள 851 கோவில்களுக்கு யாத்திரை செல்கிறது. அப்போது பக்தர்களுக்கு அயோத்தி ராமர் கோவில் பிரசாதம் வழங்கப்படவுள்ளது.
சிகாகோவில் இருந்து தொடங்கும் இந்த யாத்திரை, சுமார் 12,800 கிலோ மீட்டர் செல்கிறது. டொயோட்டா சியன்னா மினிவேனில் ராமர், சீதா தேவி, லக்ஷ்மணன் மற்றும் ஹனுமான் உள்ளிட்டோரின் சிலைகள் வைக்கப்பட்டுள்ளது. கனடாவில் சுமார் 150 கோவில்களுக்கு இந்த யாத்திரை செல்கிறது.
ரத யாத்திரை அனைத்து பெரிய கோவில்களை மட்டுமின்றி சிறிய கோவில்களுக்கும் செல்ல உள்ளது. அமெரிக்காவில் மிகப்பெரிய யாத்திரை நடைபெறுவது இதுவே முதல்முறை என்பது குறிப்பிடத்தக்கது.
