தமிழகத்தில் ப்ளஸ் 2 பொதுத்தேர்வு முடிவுகள் நாளை வெளியாகவுள்ளன.
தமிழகத்தில் மாநிலப் பாடத்திட்டத்தில் பயிலும் ப்ளஸ் 2 மாணவர்களுக்கான பொதுத்தேர்வு, கடந்த மார்ச் ஒன்றாம் தேதி முதல் 22-ம் தேதி வரை நடைபெற்றது.
இந்த தேர்வை சுமார் 7 லட்சத்து 80 ஆயிரம் மாணவ, மாணவிகள் எழுதினர்.
இதையடுத்து மாணவர்களின் விடைத்தாள்களை திருத்தும் பணி, மாநிலம் முழுவதும் 83 மையங்களில் கடந்த ஏப்ரல் ஒன்றாம் தேதி தொடங்கி 13-ம் தேதியுடன் நிறைவு பெற்றது.
இணையதளத்தில் மதிப்பெண் பதிவேற்றம் உட்பட இதர பணிகளும் நிறைவு பெற்றதைத் தொடர்ந்து, ஏற்கெனவே அறிவித்தபடி பிளஸ் 2 பொதுத் தேர்வு முடிவுகள் நாளை வெளியிடப்பட உள்ளன.
தேர்வு முடிவுகளை www.tnresults.nic.in, www.dge.tn.gov.in போன்ற இணையதளங்களில் மாணவர்கள் அறிந்து கொள்ளலாம்.
மாணவர்கள் தாங்கள் படித்த பள்ளிகள் மூலமும் தேர்வு முடிவுகளை அறியலாம்.
இதுதவிர தேர்வர்கள் பதிவு செய்த செல்போன் எண்ணுக்கு, தேர்வு முடிவுகள் குறுஞ்செய்தி வழியாகவும் அனுப்பி வைக்கப்படும் என்றும் அதிகாரிகள் தெரிவித்தனர்.
இதேபோல், 10-வகுப்பு பொதுத்தேர்வு முடிவுகள் வரும் 10-ம் தேதி வெளியாகவுள்ளன.
