பெண்ணை கொலை செய்து சூட்கேஸில் அடைத்து எடுத்து வந்த தந்தை, மகள் கைது!

ஆந்திராவில் கொலை செய்யப்பட்ட பெண்ணை சூட்கேசில் அடைத்து எடுத்து வந்து, மீஞ்சூர் ரயில் நிலையத்தில் விட்டுச்செல்ல முயன்ற தந்தை, மகளை ரயில்வே போலீசார் கைது செய்துள்ளனர்.

ஆந்திர மாநிலம் நெல்லூரில் இருந்து சென்னை நோக்கி வந்த புறநகர் மின்சார ரயில், நேற்றிரவு திருவள்ளூர் மாவட்டத்தின் மீஞ்சூர் ரயில் நிலையத்தில் நின்றது. அப்போது அதிலிருந்து இறங்கிய ஆணும், ஒரு சிறுமியும் பெரிய சூட்கேஸ் ஒன்றை நடைமேடையில் இறக்கி வைத்துவிட்டு மீண்டும் ரயிலேறி செல்ல முயன்றனர்.

இதைக்கண்ட கும்மிடிப்பூண்டி ரயில்வே பாதுகாப்பு படையினர் விரைந்து சென்று இருவரையும் மடக்கிப் பிடித்து விசாரணை நடத்தினர். மேலும், அவர்கள் விட்டுச்சென்ற சூட்கேஸிலிருந்து ரத்தம் கசிவதைக்கண்டு அதிர்ச்சியடைந்த ரயில்வே பாதுகாப்புப்படையினர், அதனை திறந்து பார்த்தபோது பெண்ணின் சடலம் இருப்பது தெரியவந்தது.

பின்னர், அவர்கள் இருவரும் கொருக்குப்பேட்டை ரயில்வே போலீசாரிடம் ஒப்படைக்கப்பட்டனர். ரயில்வே போலீசார் நடத்திய விசாரணையில், பிடிபட்ட இருவரும் நெல்லூர் பகுதியைச் சேர்ந்த சுப்பிரமணி மற்றும் அவரது 17 வயது மகள் என்பது தெரியவந்தது.

மகளை மிரட்டி பாலியல் தொழிலுக்கு அழைத்த பெண்ணை தலையில் அடித்து கொலை செய்ததும், பின்னர் உடலை அப்புறப்படுத்த எண்ணி சூட்கேசில் அடைத்து ரயிலில் எடுத்து வந்ததும் போலீசாருக்கு தெரியவந்தது. அவர்களிடம் ரயில்வே போலீசார் தொடர் விசாரணை நடத்தி வரும் நிலையில், இச்சம்பவம் அப்பகுதி மக்களிடையே அதிர்ச்சியை ஏற்படுத்தியுள்ளது.