இந்தியாவிற்காக ஏர்பஸ் நிறுவனம் தயாரித்த முதலாவது சி-295 ரக விமானம் இந்தியாவிடம் ஒப்படைக்கப்பட்டது.
கடந்த 2021-ஆம் ஆண்டு ஸ்பெயின் நாட்டில் உள்ள ஏர்பஸ் நிறுவனம் இந்திய விமானப்படைக்காக 56 சி-295 ரக விமானங்களைத் தயாரித்து அளிப்பதற்கான ஒப்பந்தத்தில் கையெழுத்திட்டது.
இதையடுத்து, ஸ்பெயின் நாட்டின் செவில் நகரிலுள்ள ஏர்பஸ் நிறுவனத்தின் உற்பத்தி ஆலையில் விமானத்தை உருவாக்கும் பணிகள் நடைபெற்று வருகின்றன.
இந்த சி-295 எம்டபிள்யூ ரக விமானமானது 5 முதல் 10 டன் எடையைச் சுமந்து செல்லும் திறன் படைத்தது. பாராசூட் குழுவினரைக் குறிப்பிட்ட இடத்தில் தரை இறக்குவதற்கும், சரக்குகளைச் சுமந்து சென்று தரை இறக்குவதற்கும் இந்தவகையிலான விமானங்கள் பயன்படுகிறது.
இந்த விமானத்தைக் குறுகிய தூர ஓடுபாதையில் சுலபமாக தரையிறக்கவும், மேலெழுப்பவும் முடியும். இந்த விமானம் 11 மணி நேரம் தொடர்ச்சியாகப் பறக்கும் திறன் கொண்டது.
இந்நிலையில், நேற்று ஸ்பெயின் நாட்டில் நடைபெற்ற நிகழ்ச்சியில் ஏர் பஸ் நிறுவனத்திடமிருந்து இந்திய விமானப்படைத் தளபதி வி.ஆர்.சவுத்ரி முதல் விமானத்தைப் பெற்றுக்கொண்டார்.
இந்த ஒப்பந்தத்தின்படி 16 சி295 விமானங்கள் ஸ்பெயினிலும், மீதமுள்ள 40 விமானங்கள் குஜராத்தில் உள்ள வதோதரா ஆலையிலும் உற்பத்தி செய்யப்படும்.
வதோதராவில் உள்ள ஆலையானது, ஏர் பஸ் நிறுவனமும், டாடா நிறுவனமும் ஒருங்கிணைந்து உருவாக்கியதாகும்.
இதுபோன்ற விமானங்கள் தற்போது, அமெரிக்கா, ரஷ்யா, சீனா, பிரான்ஸ், இங்கிலாந்து, ஸ்பெயின், உக்ரைன், பிரேசில், இத்தாலி, ஜப்பான் ஆகிய நாடுகளிடம் மட்டுமே உள்ளன. தற்போது இந்தப் பட்டியலில் இந்தியாவும் இணைந்துள்ளது குறிப்பிடத்தக்கது.
