இந்தியாவில் சுற்றுப்பயணம் மேற்கொண்டுள்ள ஆஸ்திரேலிய கிரிக்கெட் அணி 3 போட்டிகள் கொண்ட ஒருநாள் தொடரில் விளையாட உள்ளது.
இன்று மொகாலியில் முதல் போட்டியும், 24-ந் தேதி இந்தூரில் 2-வது போட்டியும், 27-ந் தேதி ராஜ்கோட்டில் 3-வது போட்டியும் நடைபெற உள்ளது. இப்போட்டிகள் அனைத்தும் மதியம் 1.30 மணிக்கு தொடங்குகிறது.
இன்று இவ்விரு அணிகளுக்கும் இடையிலான முதலாவது ஒருநாள் போட்டி மொகாலியில் நடைபெற உள்ளது.
இதில், முதல் இரண்டு ஆட்டங்களில் இந்திய அணியின் கேப்டனாக கே.எல் ராகுல் அணியை வழிநடத்தி செல்கிறார். இரவீந்திர ஜடேஜா துணைக்கேப்டனாக செயல்பட உள்ளார்.
கே.எல் ராகுல் தலைமையிலான இந்திய அணியில், இரவீந்திர ஜடேஜா (துணை கேப்டன்), ருதுராஜ் கெய்க்வாட், ஸ்ரேயாஸ் அய்யர், சுப்மன் கில், சூர்யகுமார் யாதவ், இஷான் கிஷன், திலக் வர்மா, ஷர்துல் தாகூர், வாஷிங்டன் சுந்தர், அஸ்வின், பும்ரா, முகமது சமி, முகமது சிராஜ், பிரசித் கிருஷ்ணா ஆகியோர் உள்ளனர்.
பாட் கம்மின்ஸ் தலைமையிலான ஆஸ்திரேலிய அணியில், டேவிட் வார்னர், ஸ்டீவன் சுமித், மிட்செல் மார்ஷ், லபுசேன், ஸ்டோய்னிஸ், அலெக்ஸ் கேரி, மேக்ஸ்வெல், மேத்யூ ஷார்ட், ஜோஷ் இங்கிலிஸ், கேமரூன் கிரீன், மிட்செல் ஸ்டார்க், சீன் அபோட், ஆடம் ஜம்பா, ஹேசில்வுட், நாதன் எல்லீஸ், ஸ்பென்சர் ஜான்சன், தன்வீர் சங்கா ஆகியோர் உள்ளனர்.
உலகக் கோப்பை போட்டிக்குத் தயாராகுவதற்கு இந்த போட்டிகள் உதவியாக இருக்கும் என்பதால் இரு அணி வீரர்களும் சிறப்பான ஆட்டத்தை வெளிப்படுத்தும் முனைப்பில் உள்ளனர்.
ஒருநாள் போட்டியில் இந்திய, ஆஸ்திரேலிய அணிகள் இதுவரை 146 ஆட்டங்களில் விளையாடி உள்ளன. இதில், இந்தியா 54 முறையும், ஆஸ்திரேலியா 82 முறையும் வெற்றி பெற்றன. 10 ஆட்டம் முடிவு இல்லை என்பது குறிப்பிடத்தக்கது.
