மயிலாடுதுறை மாவட்டம் தில்லையாடியில் நாட்டு வெடிகள் தயாரித்த போது ஏற்பட்ட வெடி விபத்தில் 4 பேர் சம்பவ இடத்திலேயே உடல் சிதறி பலியானார்கள்.
மயிலாடுதுறை மாவட்டம் பொறையார் அடுத்த தில்லையாடி காளியம்மன் கோவில் தெரு உள்ளது. இங்கு, அந்த பகுதியைச் சேர்ந்த மோகன் என்பவருக்குச் சொந்தமான நாட்டு வெடி தயாரிக்கும் குடோன் உள்ளது.
தீபாவளிக்கு இன்னும் ஒரு மாதமே உள்ள நிலையில், அப்பகுதியைச் சேர்ந்த 7 தொழிலாளர்கள் அங்கு நாட்டு வெடி தயாரிப்பில் ஈடுபட்டுக் கொண்டிருந்தனர்.
அப்போது, யாரும் எதிர்பாராத வகையில் திடீரென்று நாட்டு வெடி பலத்த சத்தத்துடன் வெடித்தது. இதில், வெடி தயாரிப்பு பணியில் ஈட்டுப்பட்டிருந்த மதன், நிக்கேஷ், ராகவன் தொழிலாளர்கள் மற்றும் அப்பகுதியைச் சேர்ந்த மாணிக்கம் ஆகிய 4 பேர் உடல் சிதறி பரிதாபமாக உயிரிழந்தனர்.
உடலின் பாகங்களை அடையாளம் காண முடியாதபடி பல்வேறு இடங்களில் சிதறிகிடந்தன. இதன் காரணமாக அப்பகுதியில் அருகிலிருந்த வீடுகள் குலுங்கின. புகைமூட்டம் ஏற்பட்டது. இதன் காரணமாக, பொதுமக்கள் பெரும் அச்சமடைந்தனர்.
மேலும், மணிவண்ணன், பக்கிரிசாமி, மாரியப்பன், மாசிலாமணி ஆகியோர் படுகாயங்களுடன் மயிலாடுதுறை அரசு மருத்துவமனையில் சிகிச்சைக்காக அனுமதிக்கப்பட்டுள்ளனர்.
தகவல் அறிந்து சம்பவ இடத்திற்கு வந்த தீயணைப்பு வீரர்கள், போராடி தீயைக் கட்டுக்குள் கொண்டு வந்தனர். மேலும், யாராவது இடிபாடுகளில் சிக்கி உள்ளனரா என்றும் சோதனை நடத்தி வருகின்றனர்.
வெடி விபத்து தொடர்பாக, நாகப்பட்டினம் காவல் கண்காணிப்பாளர் ஹர்ஸ்சிங் நேரில் விசாரணை மேற்கொண்டார். மேலும், இந்த வெடி விபத்து குறித்து பொறையார் காவல்துறையினர் சம்பவ இடத்தில் முகாமிட்டு விசாரணை மேற்கொண்டு வருகின்றனர்.
இந்த நிலையில், வெடி தயாரிப்பு நிறுவன உரிமையாளர் மோகன் என்பவரை காவல்துறையினர் கைது செய்தனர்.
