ஆதித்யா எல்-1 விண்கலம் செயல்பாடு சூப்பராக இருப்பதாகவும், தனது இலக்கை நோக்கி சரியான பாதையில் சென்று கொண்டிருப்பதாகவும் இந்திய விண்வெளி ஆராய்ச்சி மையமான இஸ்ரோ தெரிவித்திருக்கிறது.
நிலவை ஆய்வு செய்வதற்காக அனுப்பப்பட்ட சந்திரயான்-3 விண்கலம், வெற்றிகரமாக கடந்த ஆகஸ்ட் மாதம் 23-ம் தேதி தரையிறக்கப்பட்டது. இதையடுத்து, சூரியனை ஆய்வு செய்வதற்காக ஆதித்யா எல்-1 விண்கலத்தை பி.எஸ்.எல்.வி.-சி 57 ராக்கெட் உதவியுடன், கடந்த செப்டம்பர் 2-ம் தேதி இஸ்ரோ விண்ணில் செலுத்தியது. ஆந்திர மாநிலம் ஸ்ரீஹரிகோட்டாவிலுள்ள சதீஷ் தவான் விண்வெளி ஏவு தளத்தில் இருந்து ஏவப்பட்ட இந்த விண்கலம் புவி சுற்றுவட்டப் பாதையில் வெற்றிகரமாக நிலைநிறுத்தப்பட்டது.
இந்த விண்கலம் 4 மாதங்கள் பயணித்து, பூமியில் இருந்து 15 லட்சம் கி.மீ. துாரமுள்ள ‘லாக்ரேஞ்ச் பாயின்ட் எல்1’ என்கிற இடத்தில் நிறுத்தப்பட்டு, அங்கிருந்தபடியே சூரியனை ஆய்வு செய்யும். சூரியனுக்கும், பூமிக்கும் இடையிலான துாரம் 15 கோடி கி.மீ. என்பது குறிப்பிடத்தக்கது. ஆதித்யா எல்-1 விண்கலத்தின் புவி சுற்று வட்டப்பாதை உயரம் இதுவரை 4 முறை உயர்த்தப்பட்டிருக்கிறது. தற்போது 5-வது முறையாக உயர்த்தப்பட்டிருக்கிறது.
இது தொடர்பாக, இஸ்ரோ தனது எக்ஸ் சமூகவலைதளப் பக்கத்தில் வெளியிட்டுள்ள பதிவில், “ஆதித்யா எல்-1 விண்கலத்தின் செயல்பாடு நன்றாகவும் சிறப்பாகவும் இருக்கிறது. மேலும், ஆதித்யா தனது இலக்கை நோக்கி சரியான பாதையில் சென்று கொண்டிருக்கிறது. அதாவது, சூரியனின் எல் 1 புள்ளியை நோக்கி ஆதித்யா எல்-1 விண்கலம் திட்டமிட்டப்படி பயணிக்கிறது.
ஆதித்யா விண்கலத்தை ஹாலோ சுற்றுப்பாதை நோக்கி செலுத்துவதற்கான பணிகள் வெற்றிகரமாக முடிந்திருக்கிறது. ஹாலோ பாதைக்கு விண்கலத்தை மாற்றம் செய்வதற்கான பணிகள் அக்டோபர் 6-ம் தேதி 16 விநாடிகள் வெற்றிகரமாக நடந்தன” என்று தெரிவித்திருக்கிறது.
இது ஒருபுறம் இருக்க, ஆதித்யா எல்-1 அறிவியல் தரவுகளையும் சேகரிக்கத் தொடங்கி இருக்கிறது. STEPS (Supra Thermal and Energetic Particle Spectrometer) கருவியின் சென்சார்கள் பூமியில் இருந்து 50,000 கி.மீ. தொலைவில் உள்ள அதிவெப்ப மற்றும் ஆற்றல்மிக்க அயனிகள் மற்றும் எலக்ட்ரான்களை அளவிடத் தொடங்கி இருக்கின்றன. இந்தத் தரவு பூமியைச் சுற்றியுள்ள துகள்களின் நடத்தையை ஆய்வு செய்ய உதவும் என்பது குறிப்பிடத்தக்கது.
Aditya-L1 Mission:
The Spacecraft is healthy and on its way to Sun-Earth L1.A Trajectory Correction Maneuvre (TCM), originally provisioned, was performed on October 6, 2023, for about 16 s. It was needed to correct the trajectory evaluated after tracking the Trans-Lagrangean…
— ISRO (@isro) October 8, 2023
