மேற்கு தொடர்ச்சி மலைப்பகுதியில் அமைந்துள்ள சதுரகிரி சுந்தரமகாலிங்க சுவாமி கோவிலுக்கு மகாளய அமாவாசை வழிபாட்டை முன்னிட்டு, இன்று முதல் 15-ஆம் தேதி வரை நான்கு நாட்களுக்குப் பக்தர்கள் செல்ல அனுமதி அளிக்கப்பட்டுள்ளது.
வருகிற 14-ஆம் தேதி மகாளய அமாவாசையை முன்னிட்டு இன்று முதல் வருகிற 15-ஆம் தேதி வரை சதுரகிரிக்குச் செல்ல பக்தர்களுக்கு அனுமதி வழங்கப்பட்டுள்ளது.
கோவிலுக்கு வரும் பக்தர்கள் மலைப்பாதைகளில் உள்ள நீரோடை பகுதிகளில் இறங்கி குளிப்பதற்கும், சதுரகிரி கோவிலில் பக்தர்கள் இரவில் தங்குவதற்கும் அனுமதி இல்லை. எளிதில் தீப்பற்றக் கூடிய பொருட்கள் கொண்டு செல்ல அனுமதி இல்லை. அனுமதி வழங்கப்பட்டுள்ள நான்கு நாட்களும் காலை 7 மணி முதல் 12 மணி வரை மட்டுமே பக்தர்கள் மலையேற அனுமதி வழங்கப்பட்டுள்ளது.
மேலும், அனுமதிக்கப்பட்ட நாட்களில் மழையோ அல்லது நீரோடைகளில் நீர்வரத்து அதிகமாக இருந்தாலோ மலையேறி கோவிலுக்குச் செல்ல பக்தர்களுக்கு அனுமதி இல்லை என்று வனத்துறை மற்றும் கோவில் நிர்வாகம் திட்டவட்டமாகத் தெரிவித்துள்ளது.
அதேபோல, நவராத்திரி வழிபாட்டுக்காக 22-ஆம் தேதி முதல் 24-ஆம் தேதி வரை உள்ள மூன்று நாட்களும், ஐப்பசி மாத பௌர்ணமி வழிபாட்டை முன்னிட்டு 26-ஆம் தேதி முதல் 29-ஆம் தேதி வரை உள்ள நான்கு நாட்களும் பக்தர்கள் மலையேறலாம்.
மகாளய அமாவாசைக்கு நான்கு நாட்கள், நவராத்திரிக்கு மூன்று நாட்கள், ஐப்பசி மாத பவுர்ணமி வழிபாட்டுக்கு நான்கு நாட்கள் என இந்த மாதத்தில் மொத்தம், 11 நாட்கள் பக்தர்கள் மலையேற அனுமதி வழங்கப்பட்டுள்ளது.
