உத்தரகாண்ட் சென்ற பாரத பிரதமர் நரேந்திர மோடி, பார்வதி குந்த் என்ற இடத்தில் சிவ பூஜை மற்றும் தரிசனம் செய்தார். தொடர்ந்து அப்பகுதியில் உள்ள மக்களை சந்தித்து உரையாற்றினார்.
இன்று காலை உத்தரகாண்ட் மாநிலத்தின் பித்தோராகர் மாவட்டத்தில் உள்ள ஜொலிங்காங் பகுதிக்குச் சென்ற பாரத பிரதமர் நரேந்திர மோடி, அங்கு பார்வதி குந்த் பகுதியில் சிவ பூஜை செய்து வணங்கினார். இது சிறந்த ஆன்மீக முக்கியத்துவம் மற்றும் இயற்கை அழகு மிக்க பகுதியாகும்.
தொடர்ந்து, இந்திய-சீன எல்லையில் உள்ள பித்தோராகர் மாவட்டம் gunji கிராமத்தைச் சென்றடைந்த பிரதமர் மோடிக்கு, உற்சாக வரவேற்பு அளிக்கப்பட்டது. இதன் பின் உள்ளூர் மக்களைச் சந்தித்து பிரதமர் மோடி உரையாற்றினார். மேலும், பாரம்பரிய இசைக்கருவிகளை வாசித்து மகிழ்ந்தார்.
உள்ளூர் கலை மற்றும் தயாரிப்புகளைச் சிறப்பிக்கும் கண்காட்சியையும் பார்வையிட்டார். இதைத்தொடர்ந்து இராணுவ வீரர்கள், இந்தோ-திபெத்திய எல்லைக் காவல் படையினர் மற்றும் எல்லைச் சாலைகள் அமைப்பு பணியாளர்களுடன் பிரதமர் நரேந்திர மோடி உரையாடினார்.
மேலும் நண்பகல் 12 மணியளவில், அல்மோரா மாவட்டத்தின் ஜாகேஷ்வர் நகருக்குச் செல்லும் பிரதமர், அங்கு ஜாகேஷ்வர் தாமில் பூஜை மற்றும் தரிசனம் செய்கின்றார். சுமார் 6,200 அடி உயரத்தில் அமைந்துள்ள ஜாகேஷ்வர் தாம், சுமார் 224 கற்கோயில்களைக் கொண்டுள்ளது. இதன் பிறகு மதியம் 2:30 மணி அளவில் பித்தோராகரை சென்றடையும் பிரதமர் மோடி, அங்கு கிராம மேம்பாடு, சாலை, மின்சாரம், நீர்ப்பாசனம், குடிநீர் போன்ற துறைகளில் சுமார் 4,200 கோடி ரூபாய் மதிப்பிலான பல வளர்ச்சித் திட்டங்களுக்கு அடிக்கல் நாட்டுகின்றார்.
