கோவையில் மழை வேண்டி, தவளைகளுக்குப் பொது மக்கள் திருமணம் செய்து வைத்த ருசிகர நிகழ்ச்சி நடைபெற்றது.
கோவையில் தற்பொழுது கடும் வெயில் வாட்டில் வதைத்து வருகிறது. இந்த நிலையில், கோவை வேடப்பட்டி ஊர் பொதுமக்கள் சார்பில் மழை பெய்ய வேண்டி தவளைகளுக்கு திருமணம் செய்து வைக்கும் நிகழ்ச்சி நடைபெற்றது.
ஆண் தவளைக்கு மாப்பிள்ளை வேடம் அணிந்து குரும்பபாளையம் சாலை வழியாக மாப்பிள்ளை ஊர்வலம் நடைபெற்றது. அங்கு குரும்பபாளையம் ஊர் கவுண்டர் வீட்டில் பெண் தவளைக்கு சீர்வரிசை பொருட்கள் வழங்கப்பட்டு பெண் அழைப்பு ஊர்வலம் மேளதாளம் முழங்க நடைபெற்றது.
இதைத்தொடர்ந்து, குரும்பபாளையத்தில் உள்ள அருள்மிகு விநாயகர் திருக்கோவிலில் ஊர் பொதுமக்கள் தவளைகளுக்கு திருமணம் செய்து வைக்கப்பட்டது. அப்பொழுது அங்கு கூடி இருந்த பொதுமக்கள் மங்கள அரிசியையும், மலர்களையும் தவளைகள்மேல் தூவி வாழ்த்து தெரிவித்தனர். பின்னர், மஞ்சள் நீர் தொட்டியில் தவளைகள் விடப்பட்டது. இதைத் தொடர்ந்து மீண்டும் ஊரைச் சுற்றி வந்து தவளைகள் குடும்பம் நடத்துவதற்காக கிணற்றில் விடப்பட்டது.
இந்த நிகழ்ச்சி 18 ஆண்டுகளுக்கு பிறகு தற்போது நடைபெற்று உள்ளது. இந்த ருசிகர சம்பவத்தை காண ஏராளமான பொது மக்கள் திரண்டு இருந்தனர். இதற்காக ஊரில் உள்ள ஒவ்வொரு வீட்டுக்கும் சென்று உணவு சேகரித்து அதை முனியப்பன் கோவிலில் படைத்து 3 கன்னிப் பெண்களுக்கு பூஜை செய்து சிறப்பு வழிபாடு நடைபெற்றது.
இந்த திருமண நிகழ்ச்சி முடிந்த உடன், வீராசாமி கோவிலில் கிடா வெட்டு நடத்தப்பட்டு, படையல் போட்டு பூஜை நடைபெற்றது. இரவு சாலையில் பொதுமக்கள் அமர்ந்து படையல் சாப்பிடும் நிகழ்ச்சியும் நடைபெற்றது. இந்த நிகழ்ச்சி முடிந்தவுடன் மழை பெய்யும் என்பது ஐதீகம்.
