தமிழகத்தில் 3 திட்டங்களில் போலி பயனாளிகள் அடையாளம் காணப்பட்டுள்ளதாகத் தமிழக பாஜக மாநில துணைத் தலைவர் நாராயணன் திருப்பதி குற்றம் சாட்டியுள்ளார்.
இது தொடர்பாக, தமிழக பாஜக மாநில துணைத் தலைவர் நாராயணன் திருப்பதி வெளியிட்டுள்ள அறிக்கையில், மத்திய அரசின் பல்வேறு திட்டங்களை மாநில அரசுகள் செயல்படுத்தி வருகின்றன.
உர மானியம், விவசாயிகள் கௌரவ நிதி, நூறுநாள் வேலை வாய்ப்பு திட்டம் ஆகிய திட்டங்களை மாநில அரசுகள் பயனாளிகளை அடையாளம் கண்டு செயல்படுத்தும் போது, பல்வேறு முறைகேடுகள் நடைபெறுவதையடுத்து, போலி பயனாளிகளை அடையாளம் காணும் பெரும் முயற்சியில் மத்திய அரசு இறங்கியுள்ளதோடு, இந்த திட்டங்களைச் செயல்படுத்தும் மாநில அரசுகளையும் முடுக்கி விட்டுள்ளது.
விவசாயிகள் கௌரவ நிதி திட்டத்தில் மட்டுமே பல்வேறு மாநிலங்களில் இது வரை 1 கோடியே, 71 லட்சம் போலி மற்றும் தகுதியில்லாத பயனாளிகள் விவசாயிகள் கௌரவ நிதி திட்டத்தில் இணைக்கப்பட்டுள்ளது கண்டுபிடிக்கப்பட்டுள்ளது. இதன் மூலம் இந்த வருடம் மட்டும் தவறான, தகுதியற்ற நபர்களுக்குச் செல்லவிருந்த ரூபாய் 9000 கோடி தடுக்கப்பட்டு, சரியான தகுதி வாய்ந்த நபர்களை அடையாளம் கண்டு வழங்கப்படும்.
மத்திய அரசால் வழங்கப்படும் மானியமாக வழங்கப்படும் உரம் விவசாய தேவைகளுக்கு இல்லாமல், தவறாகத் தொழிற்சாலைகளுக்குப் பயன்படுத்தப்படுவதை மத்திய அரசின் சோதனைக்குக்கள் கண்டுபிடித்துள்ளன. இதன் மூலம் இந்த ஆண்டு மட்டும் ரூபாய் 5000 கோடி சேமிக்கப்படும் என எதிர்பாக்கப்படுகிறது.
இதே போல், நூறு நாள் வேலைவாய்ப்பு திட்டத்திலும் போலி பயனாளிகள் மற்றும் தகுதி பெறாத பயனாளிகள் கண்டுபிடிக்கப்பட்டு அகற்றப்பட்டுள்ளனர். இதன் மூலம் இந்த நிதியாண்டில் மட்டும் போலி பயனாளிகளுக்குச் செல்லவிருந்த ரூபாய் 4000 கோடி சேமிக்கப்பட்டு, உரிய, தேவையான பயனாளிகள் அடையாளம் காணப்பட்டு அவர்களுக்கு வேலை வாய்ப்பு வழங்கப்படும்.
ஆக மொத்தம் இந்த மூன்று திட்டங்களில் மட்டும் ரூபாய் 18,000 கோடி மக்கள் பணம் போலி பயனாளிகள் வசம் செல்லாமல் சேமிக்கப்படும் என எதிர்பார்க்கப்படுகிறது. மாநில அரசுகள் மத்திய அரசோடு இணைந்து பணியாற்றுவதன் மூலம் மட்டுமே இது போன்ற முறைகேடுகளைத் தடுக்க முடியும் எனத் தெரிவித்துள்ளார்.
திமுக அரசு செயல்படுத்தி வரும் திட்டங்களில் போலி பயனாளிகள் என்ற குற்றச்சாட்டு பெரும் பரபரப்பை ஏற்படுத்தியுள்ளது.
