நாடு முழுவதும் சரக்கு போக்குவரத்துக்காக, ‘ஆப்ட் ரூட்’ என்ற இலவச செயலியை, சென்னை ஐ.ஐ.டி., உருவாக்கியுள்ளது.
சென்னை ஐ.ஐ.டி.,யின் ஆசிரியர்கள், மாணவர்கள், முன்னாள் மாணவர்கள் ஆகியோர் இணைந்து, நாடு முழுதும் பயன்படும் வகையில், சரக்கு போக்குவரத்துக்கு உதவும், மொபைல்போன் செயலியை வடிவமைத்து உள்ளனர்.
இந்த செயலியை பயன்படுத்த, எந்த கட்டணமும் கிடையாது. இடைத்தரகர்கள் இல்லாமல், வாகன ஓட்டுநருக்கே நேரடியாக வாடகை கட்டணம் சேரும் வகையில், வடிவமைக்கப்பட்டு உள்ளது.
இதுகுறித்து சென்னை ஐஐடி கணினி அறிவியல் மற்றும் பொறியியல் துறையின் பேராசிரியர் நாராயணசுவாமி கூறுகையில், “ஆப்ட் ரூட் செயலியானது சரக்கு ஏற்றுதல் மற்றும் போக்குவரத்துக் களத்தில் ஓட்டுநர்கள் மற்றும் வாடிக்கையாளர்களுக்கு இடையே உள்ள இணைப்பில் ஏற்படும் சிக்கல்களைத் தீர்ப்பதை நோக்கமாகக் கொண்டிருக்கிறது. மேலும், வாகன ஓட்டுனர்களுக்கு சரக்கு இறக்கி விட்டு திரும்பும்போதும், உரிய லோடு கிடைக்க வழி வகை கிடைக்கும் என்று கூறினார்.
டெல்லி, சண்டிகர், கோல்கட்டா, சென்னை, கோவை என பல நகரங்களை இணைக்கும் வகையில், ‘ஆப்ட் ரூட்’ என்ற செயலி உருவாக்கப்பட்டுள்ளது. இந்த செயலி, கூகுள்பிளே ஸ்டோரில் பதிவிறக்கம் செய்ய ஏற்பாடு செய்யப்பட்டுள்ளதாக, சென்னை ஐ.ஐ.டி. தெரிவித்துள்ளது.
