பிரேசில் மற்றும் அர்ஜென்டினா அணிகளுக்கான உலகக்கோப்பை தகுதிச் சுற்றில் பிரேசில் மற்றும் அர்ஜென்டினாவை சேர்ந்த இரசிகர்கள் திடீரென மோதலில் ஈடுபட்டனர்.
2026 ஆம் ஆண்டு ஆண்களுக்கான கால்பந்து உலகக்கோப்பை தொடர் நடைபெற உள்ளது. அதற்கான தகுதிச்சுற்றுகள் தற்போது நடைபெற்று வருகிறது.
தென் அமெரிக்கா நாடுகளுக்கான தகுதிச் சுற்று ஒன்றில் இந்திய நேரப்படி இன்று காலை 6 மணிக்கு அர்ஜென்டினா- பிரேசில் அணிகள் விளையாடின.
இந்தப் போட்டி பிரேசில் நாட்டின் ரியோ டி ஜெனிரோவில் உள்ள மரகானா மைதானத்தில் நடைபெற்றது. இந்தப் போட்டியை காண பிரேசில் மற்றும் அர்ஜென்டினாவை சேர்ந்த இரசிகர்கள் ஆயிரக்கணக்கானோர் குவிந்து இருந்தனர்.
போட்டி தொடங்குவதற்கு முன் தேசியகீதம் இசைக்கப்பட்டது. அப்போது திடீரென கேலரில் இருநாட்டு இரசிகர்களும் மோதிக் கொண்டனர்.
அப்போது மோதலை முடிவுக்கு கொண்டு வர போலீசார், அர்ஜென்டினா இரசிகர்கள் மீது தடியடி நடத்தினர். இதனால் அதிர்ச்சி அடைந்த மெஸ்சி, தனது சக வீரர்களுடன் மைதானத்தில் இருந்து வெளியேறினார்.
நடுவரிடம் நாங்கள் விளையாட தயாராக இல்லை. வெளியேறுகிறோம் எனக் கூறி சென்றுவிட்டார். பின்னர், மோதல் முடிவுக்கு வந்தது. இதனால், சுமார் அரைமணி நேரம் போட்டி நடைபெறவில்லை.
பின்னர் மெஸ்சி விளையாட சம்மதம் தெரிவித்தார். அதனைத் தொடர்ந்து அரைமணி நேரம் தாமதமாக போட்டி நடைபெற்றது.
இந்தப் போட்டியில் அர்ஜென்டினா 1-0 என வெற்றி பெற்றது. அர்ஜென்டினாவின் நிக்கோலஸ் ஒடாமெண்டி 63-வது நிமிடத்தில் கோல் அடித்தார்.
