ராஜஸ்தான் மாநில சட்டமன்றத் தேர்தலில் மாலை 5 மணி நிலவரப்படி 68.24 சதவீத வாக்குகள் பதிவாகி இருப்பதாக தேர்தல் ஆணையம் தெரிவித்திருக்கிறது.
ராஜஸ்தான் மாநில சட்டமன்றத்தின் பதவிக்காலம் டிசம்பர் மாதத்தோடு நிறைவடைகிறது. ஆகவே, இம்மாநிலத்துக்கு நவம்பர் 25-ம் தேதி தேர்தல் நடைபெறும் என்று இந்திய தலைமைத் தேர்தல் ஆணையம் அறிவித்திருந்தது.
அதன்படி, ராஜஸ்தானில் மொத்தமுள்ள 200 தொகுதிகளில் 199 தொகுதிகளுக்கு இன்று வாக்குப்பதிவு நடைபெற்றது. கரன்பூர் தொகுதியின் காங்கிரஸ் வேட்பாளர் குர்மீத் சிங் கூனார் உயிரிழந்ததைத் தொடர்ந்து, அத்தொகுதிக்கு தேர்தல் ஒத்திவைக்கப்பட்டிருக்கிறது.
இந்த நிலையில், ராஜஸ்தான் மாநிலத்தில் மாலை 5 மணி நிலவரப்படி 68.24 சதவீத வாக்குகள் பதிவாகி இருக்கிறது. தேர்தல் ஆணைய அறிக்கையின்படி, பாகிடோராவில் 78.21%, தலைநகர் ஜெய்ப்பூரில் 69.22%, ஜெய்சால்மரில் 76.57%, கங்காநகரில் 72.09% சதவீத வாக்குகள் பதிவாகியுள்ளன. அதிகபட்சமாக போகரன் தொகுதியில் 81.12% வாக்குகள் பதிவாகி இருக்கிறது.
மொத்தமுள்ள 51,507 வாக்குச்சாவடிகளில் வாக்குப்பதிவு நடைபெற்றது. அமைதியான வாக்குப்பதிவை உறுதி செய்வதற்காக 69,114 காவலர்கள், 32,876 ராஜஸ்தான் ஊர்க்காவல் படையினர், வனக்காவலர்கள் மற்றும் ஆர்.ஏ.சி. பணியாளர்கள், 700 கம்பெனி சி.ஏ.பி.எஃப். வீரர்கள் என மொத்தம் 1,02,290 பாதுகாப்புப் பணியாளர்கள் பணியில் ஈடுபடுத்தப்பட்டதாக தலைமைத் தேர்தல் அதிகாரி தெரிவித்தார்.
