தேனி மாவட்டம் ஆண்டிப்பட்டி அருகே உள்ள வைகை அணையிலிருந்து பாசனத்திற்காக ஆயிரத்து 500 கன அடி தண்ணீர் திறக்கப்பட்டுள்ளது. இதனால், கரையோரப் பகுதிகளில் வசிக்கும் மக்களுக்கு வெள்ள அபாய எச்சரிக்கை விடப்பட்டுள்ளது.
தேனி மாவட்டம் ஆண்டிபட்டி அருகே உள்ள 71 அடி உயரம் கொண்ட வைகை அணை நீர்மட்டம், கடந்த மாதம் 70 அடியை எட்டியது. இதனைத் தொடர்ந்து கடந்த மாதம் 10-ஆம் தேதி அணையிலிருந்து பெரியாறு பிரதான கால்வாயில் பாசனத்துக்கு தண்ணீர் திறந்து விடப்பட்டது. கடந்த மாதம் 15-ஆம் தேதி திருமங்கலம் பிரதான கால்வாயில் பாசனத்துக்கு தண்ணீர் திறந்து விடப்பட்டது.
வைகை அணையில் இருந்து திருமங்கலம் பிரதான கால்வாயில் கடந்த மாதம் 25-ஆம் தேதி தண்ணீர் திறப்பு நிறுத்தப்பட்டது. இருந்தபோதும் பெரியாறு பிரதான கால்வாயில் தொடர்ந்து தண்ணீர் திறக்கப்பட்டு வருகிறது.
கடந்த மாதம் 23-ஆம் தேதி முதல் 29-ஆம் தேதி வரை இராமநாதபுரம் வைகை பூர்வீக பாசனப் பகுதி 1-க்கு வைகை அணையில் இருந்து ஆற்றில் ஆயிரத்து 504 மி.கன அடி தண்ணீர் திறக்கப்பட்டது.
கடந்த 1-ஆம் தேதி முதல் 5-ஆம் தேதி வரை 5 நாட்களுக்கு சிவகங்கை வைகை பூர்வீக பாசனப் பகுதி 2-க்கு அணையிலிருந்து வைகை ஆற்றில் மொத்தம் 619 மி.கன அடி தண்ணீர் திறந்து விடப்பட்டது.
இந்த நிலையில், இன்று முதல் வருகிற 8-ஆம் தேதி வரை வைகை அணையிலிருந்து, மதுரை வைகை பூர்வீக பாசனப் பகுதி 3-க்கு வைகை ஆற்றில் மொத்தம் 343 மி.கன அடி திறக்கப்படுகிறது.
அணையிலிருந்து இன்றும், நாளையும் வினாடிக்கு ஆயிரத்து 500 கன அடி வீதமும், வெள்ளிக்கிழமை வினாடிக்கு 970 கன அடி வீதமும் தண்ணீர் திறந்து விடப்படும் என்று வைகை அணை பொதுப்பணித்துறை பொறியாளர்கள் தெரிவித்துள்ளனர்.
அணையிலிருந்து தண்ணீர் திறக்கப்பட்டுள்ளதால், வைகை ஆற்றின் கரையோரப் பகுதிகளில் வசிக்கும் மக்களுக்கு வெள்ள அபாய எச்சரிக்கை விடுக்கப்பட்டுள்ளது.
