தென்னாப்பிரிக்கா மைதானங்களில் பேட்டிங் செய்வது சவாலானது என இந்திய கிரிக்கெட் அணியில் தலைமை பயிற்சியாளர் ராகுல் டிராவிட் தெரிவித்துள்ளார்.
இந்திய கிரிக்கெட் அணி தென் ஆப்பிரிக்காவிற்குச் சுற்றுப்பயணம் மேற்கொண்டு டி20, ஒரு நாள் போட்டி மற்றும் இரு டெஸ்ட் போட்டி என மூன்று வடிவிலான கிரிக்கெட்டிலும் விளையாடவுள்ளது. இதுவரை இந்திய கிரிக்கெட் அணி தென்னாபிரிக்கா மண்ணில் மட்டும் டெஸ்ட் தொடரை வென்றதில்லை.
இந்நிலையில் தென்னாப்பிரிக்கா மைதானங்கள் பேட்டிங் செய்வதற்கு சவாலானது என இந்திய அணியின் தலைமை பயிற்சியாளர் ராகுல் டிராவிட் தெரிவித்துள்ளார். இதுகுறித்து அவர், ” பேட்டிங் செய்வதற்குச் சவாலான இடம் தென்னாப்பிரிக்கா என்பதைப் புள்ளி விவரங்களே சொல்லும். உலகிலேயே பேட்டிங் செய்வதற்குக் கடினமான இடங்களில் ஒன்று தென்னாப்பிரிக்கா. குறிப்பாக இங்குள்ள வேகப்பந்துவீச்சுக்கு உகந்த செஞ்சூரியன், ஜோகன்னஸ்பர்க் ஆடுகளங்களில் ரன் குவிப்பது சுலபமல்ல.
ஒவ்வொரு பேட்ஸ்மேனும் இங்கு எப்படி விளையாட வேண்டும் என்ற திட்டமிடலுடன் வருவார்கள். அதற்கு ஏற்ப பயிற்சியும் மேற்கொள்வார்கள். எல்லோரும் ஒரே மாதிரி ஆடுவார்கள் என்று எதிர்பார்க்க முடியாது.
ஆனால் நமது வீரர்களுக்கு எப்படி ஆடினால் கைகொடுக்கும். அதை எப்படி களத்தில் செயல்படுத்த வேண்டும் என்பதில் தெளிவான நிலையில் இருக்க வேண்டும் என்று விரும்புகிறோம். களத்தில் நிலைத்து நிற்க வாய்ப்பு அமைந்து விட்டால், அதை வெற்றிக்குரிய இன்னிங்சாக மாற்ற முயற்சிக்க வேண்டும் என்று கூறியுள்ளார்.
