சபரிமலையில் குழந்தைகள் மற்றும் மாற்றுத்திறனாளிகளுக்காக, தனி வரிசை அமைக்கப்பட்டுள்ளது.
உலகப் புகழ் பெற்ற சபரிமலை ஐயப்பன் திருக்கோவிலுக்கு, கேரளா மட்டுமல்லாது தமிழகம் உள்ளிட்ட பல்வேறு மாநிலங்களிலிருந்தும் பக்தர்கள் மாலை அணிந்து, இருமுடி கட்டிச் சென்று சுவாமி தரிசனம் செய்து வருகின்றனர்.
சபரிமலை ஐயப்ப சுவாமி திருக்கோவிலில், மண்டலக் காலத்தையொட்டி, மகரவிளக்கு பூஜைக்காகக் கடந்த 16-ஆம் தேதி கோவில் நடை திறக்கப்பட்டது. இதனையொட்டி, ஏராளமான பக்தர்கள் இருமுடி கட்டி சுவாமி தரிசனம் செய்து வருகின்றனர்.
சபரிமலையில் பக்தர்கள் கூட்டம் அதிகமாக உள்ள நிலையில், திருப்பதி உள்ளது போல பக்தர்கள் தரிசனத்திற்கு அனுப்பப்படுகின்றனர். சன்னிதானத்துக்கு சரங்குத்தி வழியாக செல்லும் போது ஆறு வரிசை வளாகத்தில் பக்தர்கள் தங்க வைக்கப்பட்டு அங்கிருந்து அனுப்பப்படுகின்றனர். பின் இவர்கள் பெரிய நடைப்பந்தலில் உள்ள வரிசையில் காத்திருந்து 18 படி ஏற வேண்டும்.
இதில், ஒரு வரிசை குழந்தைகள் மற்றும் மாற்றுத்திறனாளிகளுக்காக ஒதுக்கப்பட்டுள்ளது. குழந்தைகளுடன் அவரது பெற்றோர் ஒருவரும் அனுமதிக்கப்படுகின்றனர். இந்த வரிசையில் வயது முதிர்ந்தவர்களும் அனுமதிக்கப்படுவார்கள். இவர்கள் அதிக நேர காத்திருப்பு இல்லாமல், 18 படி ஏறி சென்று தரிசனம் செய்ய முடியும்.
குழுக்களாக வருபவர்கள் பிரிந்து தனி வரிசையில் செல்லும்போது, எங்கு சந்திக்க வேண்டும் என்பதை முன்கூட்டியே திட்டமிட்டு செல்லும்படி தேவஸ்தானம் கேட்டுக் கொண்டுள்ளது.
