தளராத வயதிலும் தகர்ந்து போகாமல் திறமையை வெளிப்படுத்திய 95 வயது முதியவர் !
ஆந்திராவில் நடைபெற்ற தடகள போட்டியில் 95 வயது முதியவர் போட்டியில் கலந்துகொண்டு அனைவரையும் பிரமிக்கச்செய்தார்.
மாநில அளவிலான தடகள 42- வது தடகள போட்டி ஆந்திராவில் நடைபெற்று வருகிறது. இந்த போட்டி ஆந்திரா மாநிலம் திருப்பதியை அடுத்த எஸ்.வி தாரகராம் மைதானத்தில் நடைபெற்றது.
இதில் குண்டூர் மாவட்டம், தெனாலியை சேர்ந்த 95 வயது நிரம்பிய நாராயணமூர்த்தி பங்குபெற்றார். இவர் உடற்கல்வி ஆசிரியராக வேலை செய்து ஓய்வு பெற்றவர்.
கடந்த 30 ஆண்டுகளாக பொதுநிலை தடகள போட்டி, மாநிலத்தில் எங்கு நடைபெற்றாலும் அதில் கலந்து கொண்டு தனது திறமையை வெளிப்படுத்தி வருகிறார்.
இந்நிலையில் டிசம்பர் 10 ஆம் தேதி நடைபெற்ற தடகள போட்டியில் நாராயணமூர்த்தி கலந்துகொண்டார். இவர் வட்டு எறிதல், ஈட்டி எறிதல், குண்டு எறிதல் உள்ளிட்ட போட்டிகளில் பங்குபெற்று தனது திறமையால் அனைவரையும் மிரள வைத்தார்.
மேலும் வருகின்ற 2024 ஆம் ஆண்டு புனேவில் நடைபெற உள்ள தேசிய மாஸ்டர் தடகள சாம்பியன்ஷிப் போட்டியில் பங்கேற்க உள்ளதாகத் தெரிவித்தார்.
தனது ஆரோக்கியத்திற்கான ரகசியத்தைத் தெரிவித்த அவர் சைவ உணவும், உடற்பயிற்சியும் செய்வதால் தான் இப்படி தன்னால் விளையாட முடிகிறது என்று தெரிவித்தார். மேலும் இவருக்கு 60 வயதிற்கு மேற்பட்ட 3 மகன்கள் உள்ளனர் என்பது குறிப்பிடத்தக்கது.
