காலாவதியான மற்றும் நடைமுறையில் இல்லாத 76 பழைய சட்டங்களை ரத்து செய்வதற்கான மசோதா, நாடாளுமன்ற மாநிலங்களவையில் நிறைவேற்றபட்டிருக்கிறது.
நாடாளுமன்ற குளிர்கால கூட்டத் தொடர் கடந்த 4-ம் தேதி தொடங்கி நடந்து வருகிறது. இக்கூட்டத் தொடர் வரும் 22-ம் தேதி வரை நடக்கவிருக்கிறது. இக்கூட்டத் தொடரில், பல்வேறு முக்கிய மசோதாக்கள் நிறைவேற்றப்பட்டு வருகிறது. அந்த வகையில், காலாவதியான மற்றும் நடைமுறையில் இல்லாத 76 பழைய சட்டங்களை ரத்து செய்வதற்கான மசோதா, நாடாளுமன்ற மாநிலங்களவையில் நிறைவேற்றபட்டிருக்கிறது.
அதாவது, நடைமுறையில் இல்லாத 76 பழைய சட்டங்களை ரத்து செய்ய, ‘ரத்து செய்தல் மற்றும் திருத்தம் செய்தல்’ மசோதா, கடந்த ஆண்டு டிசம்பர் மாதம் நாடாளுமன்றத்தில் தாக்கல் செய்யப்பட்டது. இந்த மசோதா, கடந்த ஜூலை 27-ம் தேதி மக்களவையில் நிறைவேறியது. இதையடுத்து இம்மசோதா நடப்புக் கூட்டத் தொடரில் தாக்கல் செய்யப்பட்டது. இந்த மசோதாதான் மாநிலங்களவையில் நிறைவேற்றப்பட்டிருக்கிறது.
இம்மசோதா மீதான விவாதத்துக்கு பதிலளித்துப் பேசிய மத்திய சட்ட அமைச்சர் அர்ஜூன் ராம் மேக்வால், ”மோடி அரசு பதவிக்கு வந்த பிறகு மக்களின் வாழ்க்கையை எளிதாக்கும் வகையில், 1,486 பழைய சட்டங்களை ரத்து செய்தது.
தற்போது, மேலும் 76 சட்டங்கள் ரத்து செய்யப்பட்டிருக்கின்ற. இதில், நிலம் கையகப்படுத்துதல் (சுரங்கங்கள்) சட்டம்-1885, தந்தி கம்பிகள் (சட்டவிரோதமாக வைத்திருத்தல்) சட்டம்-1950 உள்ளிட்டவை அடங்கும். இதன் மூலம், இதுவரை 1,562 காலாவதி சட்டங்கள் ரத்து செய்யப்பட்டுள்ளன” என்றார்.
