ஆஸ்திரேலியா அணியின் கிரிக்கெட் வீரர் டேவிட் வார்னர் தனது கடைசி போட்டியில் விளையாடவுள்ள நிலையில் அவரது பையை யாரோ ஒருவர் திருடியுள்ளனர்.
ஆஸ்திரேலிய – பாகிஸ்தான் அணிகளுக்கு இடையே மூன்று போட்டிகள் கொண்ட டெஸ்ட் தொடர் நடைபெற்று வருகிறது. இந்த தொடரின் கடைசி போட்டி நாளை சிட்னியில் நடைபெற உள்ளது.
இந்நிலையில் ஆஸ்திரேலியா கிரிக்கெட் வீரர் டேவிட் வார்னர் சர்வதேச டெஸ்ட் மற்றும் ஒரு நாள் போட்டிகளிலிருந்து ஓய்வை அறிவித்துள்ளார். நாளை நடைபெறும் போட்டியே டேவிட் வார்னரின் கடைசிப் போட்டியாக உள்ளது.
இந்நிலையில் டேவிட் வார்னரின் பையை யாரோ ஒருவர் திருடிய சம்பவம் நடந்துள்ளது. நாழி நடைபெறும் போட்டியில் பங்கேற்க வீர்ரகள் மெல்போர்னில் இருந்து சிட்னிக்குச் சென்ற போது அதன் இடையே அவரது பை காணாமல் போயுள்ளது.
அந்தப் பையில் டேவிட் வார்னர் டெஸ்ட் போட்டிகளில் அணியும் தொப்பி உள்ளது. ஆஸ்திரேலியா வீரர்களைப் பொறுத்தவரை டெஸ்ட் போட்டிகளுக்கு என பிரத்தியேகமாக அளிக்கப்படும் பச்சை நிற தொப்பி அவர்களுக்கு மிகப் பெரும் கவுரவமான ஒன்று.
திருடப்பட்ட அந்த பையில் அவரது இரண்டு பச்சை நிற தொப்பி உள்ளது. அதில் ஒன்று அவருக்கு முதன் முதலில் டெஸ்ட் போட்டியில் அறிமுகம் ஆன போது அளிக்கப்பட்டது. அதை அணிந்து தன் கடைசி போட்டியில் ஆட வேண்டும் என நினைத்து இருந்த வார்னர் தற்போது சோகத்தில் இருக்கிறார்.
இந்த நிலையில், அவர் தனது பையைத் திரும்ப ஒப்படைக்குமாறு உருக்கமான வேண்டுகோள் ஒன்றை வைத்துள்ளார். “என் லக்கேஜில் இருந்து என் பையை யாரோ ஒருவர் எடுத்து இருக்கிறார்கள்.
அதில் என் குழந்தைகளுக்கு வாங்கிய சில பரிசுப் பொருட்கள் உள்ளன. அதில் தான் என் பச்சை நிற தொப்பியும் உள்ளது. அது எனக்கு உணர்வுரீதியான ஒன்று. என் கடைசி டெஸ்ட் போட்டியில் அதை அணிந்து செல்ல வேண்டும் என விரும்புகிறேன்.” எனக் கூறி இருக்கிறார்.
மேலும் அவர், “உங்களுக்கு அது போன்ற பை தான் வேண்டும் என்றால் என்னிடம் ஒரு பை உள்ளது, அதை நீங்கள் பெற்றுக் கொள்ளலாம். உங்களுக்கு எந்த பிரச்சனையும் ஏற்படாது ” என முகம் தெரியாத திருடனிடம் கோரிக்கை வைத்துள்ளார் வார்னர்.
