செந்தில் பாலாஜி வழக்கில் 900 பேர் குற்றவாளிகளாக சேர்க்கபட்டுள்ளதாக நீதிமன்றத்தில், மத்திய குற்றப் பிரிவு காவல் துறை தகவல் தெரிவித்துள்ளது.
அமைச்சர் செந்தில் பாலாஜி, கடந்த 2011-ஆம் ஆண்டு முதல் 2015 -ம் ஆண்டு வரை போக்குவரத்து துறை அமைச்சராக இருந்தார்.
அப்போது, போக்குவரத்துறையில் வேலை வாங்கி தருவதாக கூறி பலரிடம் பணம் பெற்று மோசடி செய்ததாக சென்னை காவல் ஆணையரிடம் கணேஷ் குமார் என்பவர் புகார் அளித்தார். இதேபோல, பாதிக்கப்பட்ட பலரும் போலீசாரிடம் புகார் அளித்தனர்.
இந்த புகாரின் பேரில், செந்தில் பாலாஜி, அவரது நண்பர் பிரபு, சகாயராஜ், அன்னராஜ் ஆகியோர் மீது கடந்த 2017-ம் ஆண்டு நம்பிக்கை மோசடி, ஏமாற்றுதல், கொலை மிரட்டல் உள்ளிட்ட பிரிவுகளில் வழக்குப் பதிவு செய்யப்பட்டது.
இந்த வழக்கு சென்னையில் உள்ள எம்.பி, எம்.எல்.ஏ.க்கள் மீதான வழக்குகளை விசாரிக்கும் சிறப்பு நீதிமன்றத்தில் நடைபெற்று வருகிறது.
இந்த வழக்கில், செந்தில் பாலாஜி உள்ளிட்டோரை விடுவித்த சென்னை உயர்நீதிமன்ற உத்தரவை ரத்து செய்தது உச்ச நீதிமன்றம்.
மேலும், இந்த வழக்கை செப்டம்பர் 30-ம் தேதிக்குள் விசாரணை நடத்தி நீதிமன்றத்தில் குற்றப்பத்திரிகை தாக்கல் செய்ய சென்னை மத்திய குற்றப் பிரிவு போலீசாருக்கு உத்தரவிட்டது. இதனையடுத்து, கடந்த செப்டம்பர் மாதம் குற்றப் பத்திரிகை தாக்கல் செய்யப்பட்டது.
இந்த நிலையில், இந்த வழக்கு நீதிபதி ஜெயவேல் முன்பு மீண்டும் விசாரணைக்கு வந்தது. அப்போது காவல்துறை தரப்பில் ஆஜரான வழக்கறிஞர், கூடுதல் குற்றப்பத்திரிகையின் பேரில், வழக்கை நடத்த, தமிழக அரசிடம் இருந்து அனுமதி கிடைக்கவில்லை என்றார்.
இந்த நிலையில், இந்த வழக்கின் விசாரணையை பிப்ரவரி 2-ம் தேதிக்கு நீதிபதி தள்ளி வைத்து உத்தரவிட்டார்.
