பொங்கல் பண்டிகையை முன்னிட்டு ஆவடி மாநகர போலீஸ் எல்லையில், மூன்று ஆயிரம் போலீசார் பாதுகாப்பு பணியில் ஈடுபடுத்தப்பட்டுள்ளனர் என ஆவடி போலீஸ் கமிஷனர் சங்கர் தெரிவித்துள்ளார்.
பொங்கல் பண்டிகை முன்னிட்டு, சென்னையில் இருந்து பொதுமக்கள் தங்களது சொந்த ஊர்களுக்கு சென்று பொங்கல் பண்டிகை கொண்டாட உள்ளனர்.
இதனையொட்டி, அரசு சார்பில் கிளாம்பாக்கம், தாம்பரம், சானடோரியம், பூந்தமல்லி ஆகிய பகுதிகளில் இருந்து சிறப்பு பேருந்துகள் இயக்கப்பட்டு வருகிறது.
பூந்தமல்லியில் இருந்து கர்நாடகா, ஓசூர், கிருஷ்ணகிரி, தர்மபுரி, பெங்களூர், ஆந்திரா உள்ளிட்ட பல்வேறு மாநிலங்களுக்கு சிறப்பு பேருந்துகள் இயக்கப்பட்டு வருகிறது.
நேற்று காலையிலிருந்து கூட்டம் சற்று குறைந்த நிலையில், இன்றும், நாளையும் அதிக பயணிகள் வரக்கூடும் என கருதப்படுகிறது.
இந்த நிலையில், சிறப்பு பேருந்து நிலையத்தில் செய்யப்பட்டுள்ள பாதுகாப்பு ஏற்பாடுகள் குறித்து, ஆவடி மாநகர போலீஸ் கமிஷனர் சங்கர் பூந்தமல்லி சிறப்பு பேருந்து நிலையத்தில் ஆய்வு மேற்கொண்டார். அப்போது, அங்கு செய்யப்பட்டுள்ள பாதுகாப்பு ஏற்பாடுகள் குறித்து பயணிகளிடம் கேட்டறிந்தார்.
பின்னர், செய்தியாளர்களுக்கு பேட்டியளித்த, ஆவடி மாநகர போலீஸ் கமிஷனர் சங்கர், பயணிகளின் பாதுகாப்பு குறித்து ஆய்வு செய்தோம். பொங்கல் பண்டிகையை ஒட்டி நான்கு நாட்களுக்கு ஆவடி மாநகர போலீஸ் கமிஷனர் எல்லைக்குள் 3000 போலீசார் பாதுகாப்பு பணியில் ஈடுபடுத்தப்பட உள்ளனர் என்றார்.
இதனிடையே, பொது மக்களுக்கு போலீசார் சார்பில் அவ்வப்போது, அறிவிப்புகள் வெளியிடப்பட்டு வருகிறது. பயணிகளின் நலன் கருதி வெடி குண்டு சோதனை செய்யும் போலீசார் மோப்பநாய் உதவியுடன் பேருந்து நிலையத்திலும், பேருந்துகளிலும் சோதனை நடத்தினர்.
