இந்தியாவில் நடைபெற்று வரும் புரோ கபடி லீக் தொடரில் நேற்று நடைபெற்ற போட்டியில் தமிழ் தலைவாஸ் அணி 25 புள்ளிகள் அபார வித்தியாசத்தில் வெற்றி பெற்றது.
இந்தியாவில் உள்ள மாநிலங்களுக்கிடையே நடைபெறும் கபடி லீக் தொடரில் மொத்தம் 12 அணிகள் பங்குபெற்று விளையாடி வருகின்றன.
பெங்கால் வாரியர்ஸ், பெங்களூரு புல்ஸ், தபாங் டெல்லி கே.சி, குஜராத் ஜெயண்ட்ஸ், ஹரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பல்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோதாஸ் ஆகிய அணிகள் பங்குபெற்றுள்ளனர்.
இந்நிலையில் நேற்று ஐதராபாத்தில் நடைபெற்ற முதல் போட்டியில் ஹரியானா ஸ்டீலர்ஸ் – தபாங் டெல்லி அணிகள் விளையாடியது.
விறுவிறுப்பாக நடைபெற்ற இந்தப் போட்டியில் தபாங் டெல்லி அணி 35-32 என்ற கணக்கில் ஹரியானா ஸ்டீலர்ஸ் அணியை வீழ்த்தி வெற்றிப் பெற்றது.
இந்த வெற்றியின் மூலம் தபாங் டெல்லி அணி புள்ளி பட்டியலில் 3வது இடத்தில் உள்ளது. ஹரியானா ஸ்டீலர்ஸ் அணி 4 வது இடத்தில் உள்ளது.
இதைத் தொடர்ந்து நேற்று நடைபெற்ற மற்றொரு போட்டியில் தமிழ் தலைவாஸ் – தெலுங்கு டைட்டன்ஸ் அணிகள் விளையாடின.
இதில் ஆரம்பத்தில் இருந்தே தமிழ் தலைவாஸ் அணி புள்ளிகளை பெற்று வந்தது. ஆட்ட முடிவில் தமிழ் தலைவாஸ் அணி 54-29 என்ற கணக்கில் தெலுங்கு டைட்டன்ஸ் அணியை வீழ்த்தியது.
