24 மணி நேரத்தில், தங்கள் நாட்டைச் சுற்றி சீனாவின் 9 இராணுவ விமானங்கள் மற்றும் 6 கடற்படை கப்பல்கள் அத்துமீறி சென்றதாக தைவான் பாதுகாப்பு அமைச்சகம் குற்றம் சாட்டியுள்ளது.
கடந்த 1949-ஆம் ஆண்டு சீனாவில் உள்நாட்டு போர் தீவிரமடைந்த போது, பல தீவு கூட்டங்களை உள்ளடக்கிய தைவான் தங்களை தனிநாடாக அறிவித்துக் கொண்டது. ஆனால் அதை ஏற்க மறுக்கும் சீனா, தைவான் இப்போதும் தங்கள் நாட்டின் ஒரு பகுதியே என கூறி, சொந்தம் கொண்டாடி வருகிறது.
எனவே, தைவானை தன் கட்டுப்பாட்டின் கீழ் கொண்டு வர, சீனா பல்வேறு முயற்சிகளை செய்து வருகிறது. இதற்காக படைபலத்தைப் பயன்படுத்தவும், தயங்க மாட்டோம் என்று தைவானை மிரட்டி வருகிறது. இப்படிப்பட்ட சூழ்நிலையில் எதிரிக்கு எதிரி நண்பன் என்ற ரீதியில், தைவானுடன் அமெரிக்கா நெருக்கம் காட்டி வருகிறது. இது சீனாவை ஆத்திரமடைய செய்துள்ளது.
இதனால், தைவானைச் சுற்றி சீனாவின் இராணுவ விமானம் மற்றும் கடற்படை கப்பல்கள் அத்துமீறி செல்கிறது. இந்த எண்ணிக்கை தொடர்ந்து அதிகரித்து வருகிறது.
இந்நிலையில், திங்கட்கிழமை காலை 6 மணி முதல் செவ்வாய்க்கிழமை காலை 6 மணி வரை, கடந்த 24 மணி நேரத்தில், தங்கள் நாட்டைச் சுற்றி சீனாவின் 9 இராணுவ விமானங்கள் மற்றும் 6 கடற்படை கப்பல்கள் அத்துமீறி சென்றதாக தைவான் பாதுகாப்பு அமைச்சகம் குற்றம் சாட்டியுள்ளது. இதேபோல, தைவானில் கீலங் பகுதியில் இருந்து, வடமேற்கே 139 கிலோ மீட்டர் தொலைவில் தைவான் ஜலசந்தியை சீன பலூன் பறந்துள்ளது.
சீனாவின் இந்த நடவடிக்கைக்கு பதிலடி கொடுக்கும் விதமாக, தைவானும் இரணுவ விமானம் மற்றும் கடற்படையைச் சேர்ந்த கப்பல்களை அனுப்பியது. மேலும், சீன விமான செயல்பாட்டை கண்காணிக்க விமான பாதுகாப்பு சாதனங்களையும் அனுப்பியது.
