நாடாளுமன்றத்தில் நடைபெற்ற வாக்கெடுப்பின் போது முன்னாள் பிரதமர் மன்மோகன்சிங் சக்கர நாற்காலியில் வந்து வாக்களித்தாக பிரதமர் நரேந்திர மோடி பாராட்டு தெரிவித்துள்ளார்.
மன்மோகன்சிங் உள்ளிட்ட மாநிலங்களவை உறுப்பினர்கள் சிலரின் பதவிக்காலம் இன்றுடன் நிறைவு பெறுகிறது. இதனை முன்னிட்டு மாநிலங்களவையில் பிரிவு உபசார விழா நடைபெற்றது. இதில் பிரதமர் மோடி பங்கேற்று உரையாற்றினார். அப்போது, முன்னாள் பிரதமர் மன்மோகன்சிங்கின் பணிகளுக்கு அவர் பாராட்டு தெரிவித்தார்.
முன்னாள் பிரதமர் மன்மோகன்சிங் இந்த அவையையும், நாட்டையும் வழிநடத்திய விதம் மறக்க முடியாது. அவர் நம்மை தொடர்ந்து வழிநடத்த பிரார்த்தனை செய்கிறேன். ஜனநாயகத்தை வலுப்படுத்தியவர் அவர். நாட்டின் பொருளாதார முன்னேற்றத்திற்காக பாடுபட்டவர் என மோடி தெரிவித்தார்.
நாடாளுமன்றத்தில் வாக்கெடுப்பு நடந்ததை சுட்டிக்காட்டிய பிரதமர், அந்த வாக்கெடுப்பில் ஆட்சியாளர்கள் வெற்றி பெறுவார்கள் என தெரிந்தும், மன்மோகன் சிங் சக்கர நாற்காலியில் வந்து தனது ஓட்டை பதிவு செய்தார்.
ஒரு உறுப்பினர் தனது கடமையை எவ்வாறு நிறைவேற்ற வேண்டும் என்பதற்கு மன்மோகன்சிங் மிகச்சிறந்த உதாரணம் என்றும் அவர் நம்மை தொடர்ந்து வழிநடத்த ஆண்டவனை வேண்டுகிறேன் என்றும் பிரதமர் மோடி குறிப்பிட்டார்.
