திருநெல்வேலி மாவட்டம் வாஞ்சி மணியாச்சி அருகே, வந்தே பாரத் இரயில் மீது கல் வீசியது தொடா்பாக, 6 சிறுவர்களை பிடித்து இரயில்வே பாதுகாப்புப் படையினா் விசாரணை நடத்தி வருகின்றனா்.
சென்னையில் இருந்து திருநெல்வேலிக்கு வந்தே பாரத் இரயில் இயக்கப்பட்டு வருகிறது. இந்த இரயில் கடந்த 4-ஆம் தேதி வாஞ்சி மணியாச்சியைக் கடந்து செல்லும் போது, மர்ம நபர்கள் சிலர் கல்வீசி தாக்குதல் நடத்தினர். இந்த கல்வீச்சு சம்பவத்தில், 6 பெட்டிகளில் இருந்த கண்ணாடிகள் சேதமடைந்தன.
இச்சம்பவம் குறித்து தூத்துக்குடி இரயில்வே பாதுகாப்புக் படையினர் தீவிர விசாரணை நடத்தி வந்தனர். தொடர்ந்து, இரயிலில் இருந்த கண்காணிப்பு கேமராக்களை ஆய்வு செய்தனர். அதில், பதிவான காட்சிகளை கைப்பற்றி விசாரணை மேற்கொண்டனர்.
இந்நிலையில், கல்வீச்சு சம்பவத்தில் 6 சிறுவர்கள் ஈடுபட்டதை கண்டுபிடித்த அதிகாரிகள், அவர்களை பிடித்து தீவிர விசாரணை நடத்தி வருகின்றனர்.
