இயக்குநர் கவுதம் வாசுதேவ் மேனன் நடிகர் விக்ரமை வைத்து இயக்கிய துருவ நட்சத்திரம் படம் ரீலீஸ் தேதி குறித்த தகவல் வெளியாகியுள்ளது.
இயக்குனர் கவுதம் வாசுதேவ் மேனன் நடிகர் விக்ரமை வைத்து கடந்த 2017 ஆம் ஆண்டு தொடங்கிய படம் ‘துருவ நட்சத்திரம்’.
இப்படத்தில் விக்ரம், ரிது வர்மா, பார்த்திபன், ராதிகா, சிம்ரன், விநாயகன் உள்பட பலர் நடித்துள்ளனர். கடந்த சில ஆண்டுகளாகவே வெளிவராமல் இருந்த இந்த படம் கடந்த ஆண்டு நவம்பர் 24 ஆம் தேதி வெளியாக இருந்தது. ஆனால் வெளிவரவில்லை.
இந்தப் படத்தை வெளியிட இடைக்கால தடை விதிக்கக்கோரி ஆல் இன் பிக்சர்ஸ் நிறுவனத்தில் பங்குதாரராக உள்ள விஜய் ராகவேந்திரா என்பவர் சென்னை உயர் நீதிமன்றத்தில் மனு ஒன்றை தாக்கல் செய்திருந்தார்.
இந்த வழக்கை விசாரித்த உயர் நீதிமன்றம், பணத்தை திரும்பக் கொடுக்கும்பட்சத்தில், படத்தை வெளியிடலாம் என்று கடந்தாண்டு நவம்பர் 22 ஆம் தேதியன்று உத்தரவிட்டிருந்தது. ஆனால், இயக்குநர் கவுதம் வாசுதேவ் மேனன் பணத்தைத் திரும்ப செலுத்தாததால், இதுவரை ‘துருவ நட்சத்திரம்’ திரைப்படத்தை ரிலீஸ் செய்ய முடியவில்லை.
இந்நிலையில் மார்ச் 29 ஆம் தேதி படத்தை வெளியிடுவதாக தகவல்கள் வெளியாகியுள்ளது. அதிகாரப் பூர்வ அறிவிப்பு விரைவில் வெளியாகும் என்று எதிர்பார்க்கப்படுகிறது. இந்த முறையாவது படம் வெளியாகுமா என்பதே ரசிகர்களின் எதிர்பார்ப்பாகவுள்ளது.
