2024 -ம் ஆண்டு மக்களவைத் தேர்தல் நாடு முழுவதும் 7 கட்டங்களாக நடைபெறுகிறது. மேலும், மக்களவைத் தேர்தலுக்கான பணிகள் தீவிரம் அடைந்துள்ளது. தேர்தல் தேதி அறிவித்த நிமிடம் முதல் தேர்தல் நடத்தை விதிமுறைகள் நாடு முழுவதும் அமலுக்கு வந்துள்ளது.
இதனால், வாக்காளர்களுக்குப் பணம் மற்றும்பரிசுப் பொருட்கள் கொடுப்பதைத் தடுக்கும் வகையில் தேர்தல் ஆணையம் அதிரடி நடவடிக்கை எடுத்து வருகிறது.
அந்த வகையில், பறக்கும் படை அதிகாரிகள் தமிழகம் முழுவதும் தீவிர சோதனையில் ஈடுபட்டு வருகிறார்கள்.
இந்த நிலையில் தமிழ்நாடு தலைமை தேர்தல் அதிகாரி சத்ய பிரதா சாகு சென்னை தலைமைச் செயலகத்தில் காணொளி மூலமாக மாவட்ட தேர்தல் அதிகாரிகளான மாவட்ட கலெக்டர்களுடன் ஆலோசனை நடத்தினார்.
அப்போது, மக்களவைத் தேர்தலில் போட்டியிடும் வேட்பாளர்கள் 95 லட்சம் ரூபாய் வரை செலவு செய்யலாம் என்றும், சட்டமன்ற தொகுதிக்கான வேட்பாளர் 40 லட்சம் ரூபாய் வரை செலவு செய்யலாம் என்றும் தெரிவித்தார்.
இதனிடையே, மக்களவைத் தேர்தல் செலவுக்காகத் தமிழக அரசிடம் 750 கோடி ரூபாய் தேர்தல் ஆணையம் கேட்டுள்ளது குறிப்பிடத்தக்கது.
