திண்டுக்கல் மாவட்டம் நத்தம் அருகே மிகவும் பிரசித்தி பெற்ற வேட்டைக்காரன் சுவாமி கோவிலில், ஆண்கள் மட்டுமே பங்கேற்ற திருவிழாவில், ஆடுகளை பலியிட்டு ஆயிரக்கணக்கானோருக்கு அசைவ உணவு வழங்கப்பட்டது.
நத்தம் அடுத்த உலுப்பகுடி கிராமத்தில் மிகவும் பிரசித்தி பெற்ற வேட்டைக்காரன் சுவாமி கோவில் அமைந்துள்ளது. இக்கோவிலில், ஆண்கள் மட்டுமே பங்கேற்கும், பாரம்பரிய திருவிழா நடந்து வருகிறது. இந்த திருவிழா 2 வாரம் நடைபெறுவது வழக்கம்.
அதன்படி முதல் திருவிழா கடந்த செவ்வாயன்று நடந்தது. இந்நிலையில் இந்த வருடத்திற்கான 2-வது படையல் திருவிழா வெகு விமரிசையாக நடந்தது. நேற்று நள்ளிரவு 1.00 மணிக்கு மேல் சுவாமிக்கு பொங்கல் வைக்கப்பட்டு விழா தொடங்கியது.
இதனை அடுத்து பக்தர்கள் நேர்த்திக்கடனாக வழங்கிய 50-க்கும் மேற்பட்ட ஆடுகளை சுவாமிக்கு பலியிட்டு, பக்தர்களுக்கு உணவு சமைக்கப்பட்டது. ஏராளமான அண்டாக்களில் அசைவ உணவு சமைக்கப்பட்டது.
இதனைத் தொடர்ந்து, இன்று காலை சுவாமிக்கு உணவு படையல் போடப்பட்டது. பின்னர் சுவாமிக்கு சிறப்பு தீபாராதனை காண்பிக்கப்பட்டது.
இதனையடுத்து நீண்ட வரிசையில் காத்திருந்த ஆயிரக்கணக்கான பக்தர்களுக்கு அசைவு உணவு வழங்கப்பட்டது. இந்த திருவிழாவில், நத்தம் மற்றும் சுற்றுவட்டாரப் பகுதிகளை சேர்ந்த ஏராளமான ஆண்கள் கலந்து கொண்டனர்.
