மாநிலத்தின் நலனை பாதுகாப்பதற்காக, தெலுங்கு தேசம், பா.ஜ.க. மற்றும் ஜனசேனா கட்சிகள் இணைந்து செயல்பட்டு வருவதாக ஆந்திர முன்னாள் முதல்வர் சந்திரபாபு நாயுடு தெரிவித்துள்ளார்.
மக்களவை தேர்தல் வரும் ஏப்ரல் 19-ஆம் தேதி தொடங்கி ஜூன் 1-ஆம் தேதி வரை நடைபெற உள்ளது. 7 கட்டங்களாக நடத்தப்படும் தேர்தலில், பதிவாகும் வாக்குகள் ஜூன் 4-ஆம் தேதி எண்ணப்பட்டு முடிவுகள் அறிவிக்கப்பட உள்ளது. மக்களவைத் தேர்தலை முன்னிட்டு, அரசியல் கட்சிகள் தீவிர பிரச்சாரத்தில் ஈடுபட்டுள்ளனர்.
ந்திர முன்னாள் முதல்வரும், தெலுங்கு தேசம் கட்சியின் தலைவருமான சந்திரபாபு நாயுடு தனது சொந்த தொகுதியான குப்பத்தில், திங்கட்கிழமை தேர்தல் பிரச்சாரத்தைத் தொடங்கினார்.
பிரச்சாரத்தின் போது அவர் கூறியதாவது, ஜெகன்மோகன் ரெட்டி ஆட்சியில் பெண் குழந்தைகளுக்கு பாதுகாப்பு இல்லை. என்னை சட்ட விரோதமாக கைது செய்து துன்புறுத்தினர். இருப்பினும், நான் பயப்படவில்லை. எனக்கு பதவி முக்கியமில்லை. என்னை அரசியல் ரீதியாக துன்புறுத்தினார்கள். அரசியலுக்கு சம்பந்தம் இல்லாத என் மனைவியை சட்டசபையில் அவமானப்படுத்தினார்கள்.
பெண்கள் அரசியலுக்கு வர வேண்டும். எனது ஆட்சியில் பெண்களுக்கு சைக்கிள் வழங்கினேன். 30 சதவீத இட ஒதுக்கீட்டில் வேலை வாய்ப்பு வழங்கினேன். மாநிலத்தின் நலன் தான் முக்கியம். மாநிலத்தின் நலனை பாதுகாப்பதற்காக, தெலுங்கு தேசம், பா.ஜ.க. மற்றும் ஜனசேனா இணைந்து செயல்பட்டு வருகிறது.
மாநிலத்தில் கஞ்சா மற்றும் போதைப்பொருள் விற்பனை அதிகரித்து உள்ளது. இதனால், போதையில் இருப்பவர்கள் தாய் யார்? சகோதரி யார்? என தெரியாமல் நடந்து கொள்கின்றனர்.
இப்பகுதியில் உள்ள கிளை கால்வாய்கள், அந்திரி நிவா திட்டத்தின் கீழ் தூர்வரப்படும். ஒவ்வொரு ஏக்கர் நிலத்திற்கும் பாலாற்றில் இருந்து தண்ணீர் கொண்டு செல்ல வேண்டியது எனது பொறுப்பு. முதியோர் மற்றும் ஆதரவற்ற பெண்களுக்கு மாதம் 4000 ரூபாய் வழங்கப்படும் என்றும் அவர் கூறினார்.
மீண்டும் ஆட்சிக்கு வந்தால், ஒவ்வொரு வீட்டிற்கும் ஆண்டுக்கு ரூ.15 ஆயிரமும், 3 கியாஸ் சிலிண்டர்களும் இலவசமாக வழங்கப்படும் என்று கூறினார்.
