லண்டன் பல்கலைக்கழக கல்லூரி பால்வெளியின் புதிய புகைப்படம் ஒன்றை வெளியிட்டது. அந்த படத்தின் மூலம் பால்வெளி அண்டத்தின் மிகப்பெரிய கருந்துளையின் Sagittarius A* என்ற மையப் பகுதி உள்ளதை வெளிப்படுத்தியுள்ளது.
இதன் மூலம் முதல் முறையாகப் பால்வீதியின் மையத்தில் இருக்கும் பிரம்மாண்டமான கருந்துளை மற்றும் அதன் காந்தப்புல அமைப்பு பற்றித் தெரியவந்துள்ளது.
ஏற்கனவே ஹபுள், ஜேம்ஸ்வெப் ஆகிய தொலைநோக்கிகள் மூலம் எடுக்கப்பட்ட பால்வெளி படங்களிலிருந்து மாறுபட்டிருக்கும் இந்தப் புதிய படங்கள் ஈவன்ட் ஹாரிசன் தொலைநோக்கி (Event Horizon Telescope) மூலம் எடுக்கப்பட்டுள்ளன.
இந்த படங்கள் மூலம் அனைத்து கருந்துளைகளும் இதேபோன்ற வலுவான காந்தப்புலங்களைக் கொண்டிருக்கலாம் என்ற சாத்தியத்தையும் உருவாக்கியுள்ளது. இந்தக் கருந்துளை பூமியிலிருந்து சுமார் 27,000 ஒளி ஆண்டுகள் தொலைவில் உள்ளது.
இந்த ஆய்வில் ஈடுபட்ட விஞ்ஞானிகள், இந்த கருந்துளைகள் தோற்றத்திற்கு அப்பாற்பட்ட பண்புகளைக் கொண்டுள்ளனவா என்று ஆராய்ச்சி செய்யவும் முயன்றுள்ளனர்.
M87 என்ற இந்த கருந்துளையைச் சுற்றியுள்ள ஒளி பற்றிய முந்தைய ஆய்வுகள், காந்தப்புலங்கள் கருந்துளைக்குள் பொருட்களைச் செலுத்தப் பயன்படுத்தப்படுவதைக் கண்டறிந்துள்ளன.
இது Sagittarius A* க்கும் பொருந்தும் என்று புதிய ஆராய்ச்சி கூறுகிறது. இது கருந்துளைகள் வாயு மற்றும் அவற்றைச் சுற்றியுள்ள பொருட்களுடன் எவ்வாறு தொடர்பு கொள்கின்றன என்றும் காட்டுவதாக ஆராய்ச்சியாளர்கள் கூறுகின்றனர்.
இதுகுறித்து பேசிய ஆராய்ச்சி இணை ஆசிரியர் ஜிரி யூன்சி, “நமது விண்மீன் மண்டலத்தின் இதயத்தில் உள்ள கருந்துளையின் படங்களை முதல் முறையாகப் பார்ப்பது மிகவும் உற்சாகமாக இருக்கிறது. இதன் மூலம் கருந்துளையைச் சுற்றியுள்ள காந்தப்புலங்களைப் பற்றிய பல தகவல்கள் தெரியவருகின்றன.
ஒளி என்பது ஒரு ஊசலாடும் மின்காந்த அலையாகும். இந்தக் கருந்துளைகளைச் சுற்றியுள்ள பிளாஸ்மா காந்தப்புலங்களைச் சுற்றிச் சுழலும் துகள்களைக் கொண்டது.
இது கருந்துளை பகுதிகளில் என்ன நடக்கிறது என்பதைக் கண்டறிய உதவுகிறது. காந்தப்புலக் கோடுகளை வரைபடமாக்கவும் அனுமதிக்கிறது” என்று கூறினார்.
