மயிலாடுதுறையில் நடமாடும் சிறுத்தையை பிடிக்க வனத்துறையினர் தீவிர நடவடிக்கை எடுத்து வருகின்றனர். மூன்று நாட்களாகியும் சிறுத்தை பிடிபடாததால், மக்கள் பீதி அடைந்துள்ளனர்.
கடந்த சில தினங்களுக்கு முன்பு, செம்மங்குளம் அருகே இரவு நேரத்தில் சிறுத்தை நடமாடியதை சிலர் பார்த்துள்ளனர். இதனைக் கண்டு அதிர்ச்சி அடைந்த அவர்கள் உடனடியாக, போலீசார் மற்றும் வனத்துறையினருக்கு தகவல் கொடுத்தனர்.
இதனை அடுத்து, சிறுத்தையை பிடிக்க வனத்துறையினர் தீவிர நடவடிக்கை எடுத்து வருகின்றனர். பொதுமக்கள் யாரும் வீட்டை விட்டு வெளியே வர வேண்டாம் என்று அறிவுறுத்தியுள்ளனர். மேலும், சிறுத்தையின் நடமாட்டத்தை பார்த்தால், 9360889724 என்ற எண்ணிற்கு தகவல் தெரிவிக்கவும் அறிவுறுத்தப்பட்டுள்ளனர்.
சிறுத்தை நடமாட்டம் தென்படாததால், மாணவர்களின் நலன் கருதி மயிலாடுதுறையில் உள்ள 9 பள்ளிகளுக்கு இன்று ஒரு நாள் மட்டும் விடுமுறை அளிக்கப்பட்டுள்ளது.
10-ஆம் வகுப்பு பொதுத்தேர்வு நடக்கும் பள்ளிகளில் காவல்துறை, தீயணைப்புத் துறை, வனத்துறை பாதுகாப்புடன் தேர்வுகள் நடைபெறும் என்று மாவட்ட ஆட்சியர் கூறினார்.
சிறுத்தையை பிடிக்க 10 குழுக்கள் அமைக்கப்பட்டுள்ளன. சிறுத்தை விரைவில் பிடிக்கப்படும் என்று மாவட்ட நிர்வாகம் தெரிவித்துள்ளது.
சிறுத்தை நடமாடிய பகுதிகளில், சென்சார் பொருத்திய கேமராக்களுடன் தேடும் பணிகள் தீவிரமடைந்துள்ளன. ஆனைமலை புலிகள் காப்பக வன, வேட்டை தடுப்பு காவலர்கள் சிறுத்தையை தேடும் பணியில் ஈடுபட்டு உள்ளனர். மேலும், சிறுத்தையை பிடிக்க 3 ராட்சத கூண்டுகள் மற்றும் வலைகள் வரவழைக்கப்பட்டுள்ளன.
மூன்று நாட்களாகியும் சிறுத்தை பிடிபடாததால், மக்கள் பீதி அடைந்துள்ளனர். சிறுத்தையை விரைவில் பிடிக்க அவர்கள் கோரிக்கை வைத்துள்ளனர்.
