மொசாம்பிக்கின் வடக்கு கடற்கரையில், படகு கவிழ்ந்த விபத்தில், குழந்தைகள் உட்பட 94 பேர் உயிரிழந்ததாக தகவல் வெளியாகி உள்ளது. மேலும், சிலர் மாயமாகி உள்ளதால், பலி எண்ணிக்கை அதிகரிக்கக்கூடும் என்று அஞ்சப்படுகிறது.
ஆப்பிரிக்க நாடுகளில் ஒன்றான மொசாம்பிக்கின் வடக்கு கடற்கரை பகுதியில், குழந்தைகள் உட்பட 130 பேருடன் படகு ஒன்று சென்றது. அப்போது, திடீரென படகு மூழ்கியது. படகில் இருந்தவர்கள் கடலில் குதித்து தத்தளித்தனர். குழந்தைகள் உட்பட பலர் நீச்சல் தெரியாமல் கடலுக்குள் மூழ்கினர்.
படகில் கூட்டம் அதிகமாக இருந்ததாலும், பயணிகளை ஏற்றிச் செல்வதற்குப் பொருத்தமில்லாமல் இருந்ததாலும், படகு மூழ்கியதாக கூறப்படுகிறது.
இதுகுறித்து தகவலறிந்து வந்த மீட்புக் குழுவினர் 5 பேரை உயிருடன் மீட்டனர். உயிர் பிழைத்தவர்களில், இரண்டு பேர் மருத்துவமனைகளில் சிகிச்சை பெற்று வருகின்றனர். இந்த விபத்தில், குழந்தைகள் உட்பட 94 பேர் பரிதாபமாக உயிரிழந்தனர்.
மேலும், சிலர் மாயமாகி உள்ளனர். அவர்களைத் தேடும் பணியில் மீட்புக் குழுவினர் தீவிரமாக ஈடுபட்டுள்ளனர். அவர்களில், பலர் உயிரிழந்திருக்கலாம் என்பதால், பலி எண்ணிக்கை அதிகரிக்கக்கூடும் என்று அஞ்சப்படுகிறது.
