ரஜினியின் கூலி திரைப்பட டீசரில் தனது இசையை அனுமதியின்றிப் பயன்படுத்தியதாக சன் பிக்சர்ஸ் நிறுவனத்திற்கு இளையராஜா நோட்டீஸ் அனுப்பியுள்ளார்.
லோகேஷ் கனகராஜின் இயக்கத்தில் நடிகர் ரஜினிகாந்த் நடித்து வரும் கூலி திரைப்படத்தின் டீசர் அண்மையில் வெளியானது.
இந்த டீசரில், ரஜினியின் நடிப்பில் 1983-ம் ஆண்டு வெளியான தங்கமகன் திரைப்படத்தில் இடம்பெற்றிருந்த ”வா வா பக்கம் வா” பாடலின் இசை பயன்படுத்தப்பட்டிருந்தது.
இந்நிலையில், தன்னிடம் முறையான அனுமதி பெறாமல் தனது இசையை, கூலி திரைப்படத்தில் பயன்படுத்தியுள்ளதாக, இளையராஜா தரப்பிலிருந்து, படத்தின் தயாரிப்பு நிறுவனமான சன் பிக்சர்ஸ் நிறுவத்திற்கு நோட்டீஸ் அனுப்பப்பட்டுள்ளது.
இந்த பாடல்களின் ஒட்டுமொத்த உரிமையும் இளையராஜாவுக்கு சொந்தமானது எனவும் அந்த நோட்டீஸில் தெரிவிக்கப்பட்டுள்ளது.
பாடலைப் பயன்படுத்துவதற்கான முன் அனுமதியைப் பெறாவிட்டால் சட்டரீதியான நடவடிக்கை மேற்கொள்ளப்படும் எனவும் இளையராஜா தரப்பில் தெரிவிக்கப்பட்டுள்ளது.