டெல்லி முதல்வர் அரவிந்த் கெஜ்ரிவாலுக்கு இடைக்கால ஜாமின் வழங்கிய உச்ச நீதிமன்றம், பல்வேறு முக்கிய நிபந்தனைகளை விதித்துள்ளது.
மதுபான கொள்கை முறைகேடு வழக்கில் கடந்த மார்ச் 21 -ஆம் தேதி, டெல்லி முதல்வர் அரவிந்த் கெஜ்ரிவால், அமலாக்கத்துறை அதிகாரிகளால் கைது செய்யப்பட்டு, திகார் சிறையில் அடைக்கப்பட்டார்.
“மக்களவைத் தேர்தலையொட்டி, தனக்கு இடைக்கால ஜாமின் வழங்கவேண்டும்” என, உச்ச நீதிமன்றத்தில், அவர் மனு தாக்கல் செய்திருந்தார்.
இந்த மனு நீதிபதிகள் சஞ்சீவ் கண்ணா மற்றும் தீபங்கர் அமர்வில் மீண்டும் விசாரணைக்கு வந்தது. அப்போது, “அரவிந்த் கெஜ்ரிவாலுக்கு ஜூன் 1-ம் தேதி வரை இடைக்கால ஜாமின் வழங்கப்படுகிறது” என்றும், ” ஜூன் 2-ம் தேதி மீண்டும் அவர் சரணடைய வேண்டும்” என்றும் நீதிபதிகள் உத்தரவிட்டனர்.
மேலும், “முதலமைச்சர் அலுவலகத்துக்கும், தலைமைச் செயலகத்துக்கும் அரவிந்த் கெஜ்ரிவால் செல்லக்கூடாது” எனவும்,
“வழக்கு தொடர்பான சாட்சிகளை சந்திக்கக் கூடாது” என்றும் உச்ச நீதிமன்றம் திட்டவட்டமாக தெரிவித்துள்ளது. அத்துடன், “அரசு அலுவல் தொடர்பான கோப்புகளில் அரவிந்த் கெஜ்ரிவால் கையெழுத்திடக் கூடாது” என்பது உள்ளிட்ட பல்வேறு நிபந்தனகைளை உச்ச நீதிமன்றம் அதிரடியாக விதித்துள்ளது.
