சென்னை கோயம்பேட்டில் இருந்து திருவண்ணாமலைக்கு வார இறுதி நாட்கள் மற்றும் விசேஷ நாட்களில் மட்டுமே பேருந்துகள் இயக்கபடும் என்று போக்குவரத்து துறை அறிவித்துள்ளது.
தமிழ்நாடு அரசு போக்குவரத்துக் கழகம் மூலமாக சென்னை கிளாம்பாக்கம் பேருந்து நிலையத்தில் இருந்து திருவண்ணாமலைக்கு பேருந்துகள் தற்பொழுது இயக்கப்பட்டு வருகிறது.
இந்நிலையில் திருவண்ணாமலை செல்லும் பயணிகள் பெரும்பாலும் கோயம்பேடு மார்க்கெட் மற்றும் சுற்றுவட்டார பகுதிகளில் பணி செய்து வருவதால், கோயம்பேட்டில் இருந்து பேருந்துகளை இயக்க கோரிக்கை விடுத்தனர்.
இதனையடுத்து பயணிகளின் கோரிக்கையை ஏற்று மே 23-ஆம் தேதி முதல் கோயம்பேட்டில் இருந்து திருவண்ணாமலைக்கு 85 பேருந்துகள் தினந்தோறும் இயக்கப்படும் என போக்குவரத்துத் துறை அறிவித்திருந்தது.
அதில் தற்போது மாற்றம் செய்யப்பட்டு மே 24-ஆம் தேதி முதல் ஒவ்வொரு வாரமும் வெள்ளி, சனி ஆகிய வார இறுதி நாட்கள் மற்றும் விஷேச நாட்களில் சென்னை கோயம்பேடு பேருந்து நிலையத்திலிருந்து காஞ்சிபுரம், வந்தவாசி வழியாக திருவண்ணாமலைக்கு பேருந்துகள் இயக்கப்படும் என்று தெரிவித்துள்ளது.
இந்த பேருந்துகளுடன் சேர்த்து கூடுதலாக சிறப்பு பேருந்துகளும் ஆற்காடு, ஆரணி வழியாக திருவண்ணாமலைக்கு இயக்கப்படும் எனவும் போக்குவரத்து துறை புதிய அறிவிப்பை வெளியிட்டுள்ளது.
