ராமநாதபுரம் மாவட்டம், ராமேஸ்வரம் அருகே கடலில் விசைப்படகு மூழ்கிய விபத்தில் 2 பேர் உயிரிழந்த நிலையில் மேலும் ஒருவரை தேடும் பணி தீவிரமாக நடைபெற்று வருகிறது.
மண்டபம் பகுதியைச் சேர்ந்த சுதர்சன் என்பவருக்கு சொந்தமான விசைப்படகில் 5 மீனவர்கள் வழக்கம் போல் மீன்பிடிக்க கடலுக்குச் சென்றனர்.
அப்போது 6 கடல் மைல் தொலைவில் சென்றுகொண்டிருந்த விசைப்படகு திடீரென பழுதாகி கடலில் மூழ்கியது. இந்த விபத்தில் அனைவரும் தண்ணீரில் மூழ்கிய நிலையில் ஹமது ஹனீபா, பிரசாத் ஆகியோரை சக மீனவர்கள் பாதுகாப்பாக மீட்டனர்.
மேலும் கடலில் மாயமான பரக்கத்துல்லா, கலீல் ரஹ்மான், ஆரோக்கியம் ஆகியோரை தேடும் பணி நடைபெற்று வந்த நிலையில், ஆரோக்கியம், பரகத்துல்லா ஆகியோர் உயிரிழந்துவிட்டதாக தகவல் வெளியாகியுள்ளது. மீதமுள்ள கலீல் ரஹ்மான் என்பவரை மட்டும் தேடும் பணி தீவிரமாக நடைபெற்று வருகிறது.
