தமிழகத்திலிருந்து திமுக அரசு அகற்றப்பட வேண்டும்! – எச்.ராஜா

கள்ளச்சாராய உயிரிழப்புகளுக்கு யார் காரணம் என்பதை வீடு, வீடாக சென்று மக்களிடம் எடுத்துக்கூறுவோம் என பாஜக மூத்த தலைவர் எச்.ராஜா தெரிவித்துள்ளார்.

கள்ளக்குறிச்சியில் கள்ளச்சாராயம் குடித்து 50க்கும் மேற்பட்டோர் உயிரிழந்த விவகாரத்தில் திமுக அரசை கண்டித்து மதுரை மாவட்ட ஆட்சியர் அலுவலகம் அருகே பாஜகவினர் ஆர்ப்பாட்டம் நடத்த முயன்றனர்.

ஆனால், காவல்துறையினர் அனுமதி மறுத்ததால், இரு தரப்பினருக்கு இடையே வாக்குவாதம் மற்றும் தள்ளுமுள்ளு ஏற்பட்டது. இதையடுத்து, சாலை மறியலில் ஈடுபட்ட 200க்கும் மேற்பட்ட பாஜகவினரை வலுக்கட்டாயமாக குண்டுக்கட்டாக தூக்கி சென்று போலீசார் கைது செய்தனர்.

அவர்களை விடுவிக்கக்கோரி போலீசாரிடம் வாக்குவாதம் செய்த பாஜக மூத்த தலைவர் எச்.ராஜா மற்றும் மாவட்ட தலைவர் மகா.சுசீந்திரன் ஆகியோரும் கைது செய்யப்பட்டனர்.

முன்னதாக செய்தியாளர்களை சந்தித்த எச்.ராஜா, மக்களை கொல்வதற்காகத்தான் திமுக 40 தொகுதிகளில் வென்றதாகவும், தமிழகத்திலிருந்து திமுக அரசு அகற்றப்பட வேண்டும் எனவும் தெரிவித்தார்.

கள்ளச்சாராய உயிரிழப்புக்கு யார் காரணம் என்பதை மக்களிடம் எடுத்துக் கூறுவதற்காக தான் பாஜக போராட்டம் நடத்துகிறது என அவர் கூறினார். மேலும், கள்ளச்சாராய உயிரிழப்பு விவகாரத்தில் முதலமைச்சர் மு.க.ஸ்டாலின் ஓடி ஒளிந்து கொண்டுள்ளார் எனவும் எச்.ராஜா விமர்சித்தார்.