பிரதமர் மோடியின் மனதின் குரல் நிகழ்ச்சியின் 111-ஆவது அத்தியாயத்துக்கு தமிழக பாஜக தலைவர் அண்ணாமலை புகழாரம் சூட்டியுள்ளார்.
இதுதொடர்பாக அவர் வெளியிட்டுள்ள அறிக்கையில், தனது 111-ஆவது மனதின் குரல் நிகழ்ச்சியில், 1855-ஆம் ஆண்டில் ஆங்கிலேயர்களை எதிர்த்து தீரத்துடன் போரிட்ட பழங்குடியின போராளிகள் வீர சித்து மற்றும் கன்ஹுவுக்கு பிரதமர் மோடி மரியாதை செலுத்தியதாக அண்ணாமலை தெரிவித்துள்ளார்.
தாய்நாட்டைக் காக்க தாயார் பெயரில் மரக்கன்றுகள் நடும் திட்டம் நாடு முழுவதும் அபார வளர்ச்சி கண்டுவருவதால் பிரதமர் மோடி மகிழ்ச்சியடைந்துள்ளதாக அண்ணாமலை கூறியுள்ளார்.
உள்ளூர் பொருட்களுக்கு முக்கியத்துவம் அளிக்கும் வகையில், கேரள மாநிலம் அட்டப்பாடியில் பழங்குடியின சகோதரிகளால் தயாரிக்கப்படும் கார்தும்பி குடைகளுக்கு பிரதமர் மோடி மனதின் குரல் நிகழ்ச்சியில் புகழாரம் சூட்டியதை அண்ணாமலை தனது அறிக்கையில் மேற்கோள்காட்டியுள்ளார்.
பாரீஸ் ஒலிம்பிக் போட்டியில் பங்கேற்கும் இந்திய அணிக்கு பிரதமர் மோடி பாராட்டு தெரிவித்ததையும், குறிப்பாக துப்பாக்கிச் சுடுதல், டேபிள் டென்னிஸ் உள்ளிட்ட பிரிவுகளில் இந்தியா முதல்முறையாக பங்கேற்பதற்கு பிரதமர் மோடி வாழ்த்து தெரிவித்ததையும் அண்ணாமலை குறிப்பிட்டுள்ளார்.
இந்திய கலாசார விழுமியங்களை குவைத் மக்களுக்கு விளக்கும் வகையில், அந்த நாட்டின் வானொலியில் ஞாயிற்றுக்கிழமைதோறும் அரை மணிநேரம் நிகழ்ச்சி நடத்துவதற்காக குவைத் அரசுக்கு பிரதமர் மோடி நன்றி தெரிவித்ததாக அண்ணாமலை கூறியுள்ளார்.
வாழ்வில் சாதகமான மாற்றங்களைப் பெற யோகாவை தினசரி அடிப்படையில் வழக்கமாக்கிக் கொள்ள வேண்டுமென சர்வதேச சமூகத்துக்கு பிரதமர் மோடி அழைப்பு விடுத்ததாக அண்ணாமலை தெரிவித்துள்ளார்.
ஆந்திரத்தைச் சேர்ந்த கோண்டா டோரா ஆதிவாசி சகோதர, சகோதரிகள் தயாரிக்கும் அரக்கு காபியை ஒவ்வோர் இந்தியரும் ருசிபார்க்க வேண்டுமென பிரதமர் பரிந்துரை செய்ததாக தனது அறிக்கையில் அண்ணாமலை தெரிவித்துள்ளார்.
ஜம்மு-காஷ்மீரைச் சேர்ந்த அப்துல் ரஷீத் மீர் என்பவரின் முயற்சியால், பனிப் பட்டாணி முதன்முறையாக லண்டனுக்கு ஏற்றுமதி செய்யப்பட்டதை பாராட்டிய பிரதமர் மோடி, இதை சாகுபடி செய்ததற்காக அவருக்கு வாழ்த்து தெரிவித்ததாக அண்ணாமலை தனது அறிக்கையில் கூறியுள்ளார்.
