மகாராஷ்டிராவில் கர்ப்பிணி உள்ளிட்ட சிலருக்கு ஜிகா வைரஸ் பாதிப்பு கண்டறியப்பட்ட நிலையில், மாநிலங்கள் தகுந்த முன்னெச்சரிக்கை நடவடிக்கை எடுக்குமாறு மத்திய சுகாதாரத் துறை அறிவுறுத்தியுள்ளது.
மகாராஷ்டிரா மாநிலம், புனேயில் கர்ப்பிணி உள்ளிட்ட சிலருக்கு ஜிகா வைரஸ் பாதிப்பு உறுதியானது. கர்ப்பிணிகளுக்கு நோய்த் தொற்று இருந்தால், அது வயிற்றில் வளரும் சிசுவையும் பாதிக்கும் என்பதால், கர்ப்பிணிகளுக்கு முறையான பரிசோதனை நடத்துமாறு மாநில அரசுகளுக்கு மத்திய சுகாதாரத் துறை அறிவுறுத்தியுள்ளது.
பகல் நேரத்தில் கடிக்கும் ஏடிஸ் கொசுக்களால் ஜிகா வைரஸ் பரவுவதால், மருத்துவமனையில் சுகாதாரத்தைப் பேணும் வகையில், கண்காணிப்பு அதிகாரிகளை உடனடியாக பணியமர்த்துமாறு மாநில அரசுகளை மத்திய சுகாதார அமைச்சகம் கேட்டுக்கொண்டுள்ளது.
இதுதவிர குடியிருப்பு பகுதிகள், பணியிடங்கள், பள்ளிகள், கட்டுமான பணி நடைபெறும் இடம் உள்ளிட்ட பகுதிகளில் கிருமிநாசினி தெளித்து சுற்றுபுற தூய்மையைப் பராமரிக்குமாறு மத்திய அரசு அறிவுறுத்தியுள்ளது.
