“வழக்கு நிலுவையில் உள்ளபோது, அதிமுக பொதுச் செயலாளர் என எப்படி மனுத்தாக்கல் செய்ய முடியும்?” என எடப்பாடி பழனிசாமிக்கு சென்னை உயர் நீதிமன்றம் கேள்வி எழுப்பியுள்ளது.
அதிமுக பொதுச் செயலாளராக எடப்பாடி பழனிசாமி அறிவிக்கப்பட்டதை எதிர்த்தும், பொதுக்குழு தீர்மானங்களை எதிர்த்தும் சென்னை உயர் நீதிமன்றத்தில் மனுக்கள் தாக்கல் செய்யப்பட்டிருந்தன.
இந்த மனுக்களை, ஓ.பன்னீர் செல்வம், மனோஜ் பாண்டியன், வைத்திலிங்கம் மற்றும் ஜே.சி.டி.பிராபகர் ஆகியேர் தாக்கல் செய்திருந்தனர்.
இந்த மனு விசாரணைக்கு வந்தபோது, எடப்பாடி பழனிசாமி முன்பு இணை ஒருங்கிணைப்பாளர் என்றும், தற்போது பொதுச் செயலாளர் எனவும் பதில் மனு தாக்கல் செய்துள்ளதாக மனுதாரர்கள் தரப்பில் தெரிவிக்கப்பட்டது.
வழக்கு நிலுவையில் உள்ளபோது, அதிமுக பொதுச் செயலாளர் என குறிப்பிட்டு எப்படி மனுத்தாக்கல் செய்ய முடியும் என எடப்பாடி பழனிச்சாமிக்கு நீதிபதி கேள்வி எழுப்பினார்.
இதற்கு எடப்பாடி பழனிசாமி தரப்பில் மன்னிப்பு தெரிவிக்கப்பட்டதை அடுத்து, வழக்கு விசாரணை ஆகஸ்ட் 7-ம் தேதிக்கு நீதிபதி ஒத்திவைத்தார்.
