மேகதாது அணை கட்டும் கர்நாடக காங்கிரஸ் அரசின் நடவடிக்கைகளை நிறுத்தி, தமிழகத்தின் உரிமைகளையும், தமிழக விவசாயிகளின் நலனையும் பாதுகாக்க வேண்டும் என தமிழக அரசுக்கு பாஜக மாநிலத் தலைவர் அண்ணாமலை வலியுறுத்தியுள்ளார்.
இதுதொடர்பாக தனது எக்ஸ் தளப்பதிவில், மேகதாது அணை தொடர்பாக, தமிழக அரசுடன் பேச்சுவார்த்தை நடத்தி தீர்வு காண வேண்டும் என்று, கர்நாடக துணை முதலமைச்சர் சிவக்குமாரிடம், பிரதமர் நரேந்திர மோடி அறிவுறுத்தியதாக குறிப்பிட்டுள்ளார்.
ஆனால், தமிழக அரசுடன் பேச்சுவார்த்தை நடத்தத் தயாராக இல்லை என்று சிவக்குமார் தெரிவித்துள்ளதன் மூலம், சந்தர்ப்பவாத இந்தி கூட்டணியின் நலனுக்காக, திமுக அரசு, தமிழக விவசாயிகளின் நலன்களைத் தாரை வார்த்ததன் விளைவு தெரிகிறது என சுட்டிக்காட்டியுள்ளார்.
மேகதாது அணை தொடர்பாக பேச்சுவார்த்தை நடத்துவதில்கூட தமிழக அரசை மதிக்காமல் கர்நாடக காங்கிரஸ் கட்சி செயல்படுகிறது என அவர் குற்றம் சாட்டியுள்ளார்.
காங்கிரஸ் கட்சியால் அவமானப்படுத்தப்படுவது திமுகவிற்கு புதிதும் அல்ல என்றும், ஆனால், ஒட்டு மொத்த தமிழக மக்களையும், விவசாயிகளையும் மதிக்காமல் நடக்கும் காங்கிரஸ் கட்சியின் எதேச்சதிகாரப் போக்கினை தமிழக பாஜக சார்பாக வன்மையாக கண்டிக்கிறேன் எனவும் கூறியுள்ளார்.
எனவே, மேகதாது அணை கட்டும் கர்நாடக காங்கிரஸ் அரசின் நடவடிக்கைகளை நிறுத்த வலியுறுத்துவதோடு, தமிழகத்தின் உரிமைகளையும், தமிழக விவசாயிகளின் நலனையும் இந்தி கூட்டணிக்காக வழக்கம்போல காவு கொடுக்காமல் நடந்து கொள்ளும்படி திமுக அரசை வலியுறுத்துவதாகவும் அண்ணாலை பதிவிட்டுள்ளார்.
