இலங்கை கடற்படையின் கப்பல் மோதி உயிரிழந்த ராமேஸ்வர மீனவர் மலைச்சாமியின் உடல் உறவினர்களிடம் ஒப்படைக்கப்பட்டது.
கடந்த ஜூலை 31ம் தேதி நெடுந்தீவு அருகே மீன்பிடித்துக் கொண்டிருந்த ராமேஸ்வரம் மீனவர்களின் விசைப்படகு மீது இலங்கை கடற்படையின் ரோந்து கப்பல் மோதியது. அப்போது படகில் இருந்த மூக்கையா, முத்து முனியாண்டி, மலைச்சாமி, ராமச்சந்திரன் ஆகிய 4 மீனவர்களும் கடலில் குதித்தனர்.
இதில் நீரில் மூழ்கி மலைச்சாமி பரிதாபமாக உயிரிழந்தார். இரண்டு மீனவர்கள் சிறு காயத்துடன் உயிர் தப்பிய நிலையில் ராமச்சந்திரன் நீரில் மூழ்கி மாயமானார். இந்நிலையில் உடற்கூராய்வுக்கு பின்னர் மலைச்சாமியின் உடல் காங்கேசன் கடற்படை அதிகாரிகளிடம் ஒப்படைக்கப்பட்டது.
அதனைத்தொடர்ந்து ராமேஸ்வரம் மீன்பிடி துறைமுகத்திற்கு கொண்டுவரப்பட்ட மலைச்சாமியின் உடல் அவரது உறவினர்களிடம் ஒப்படைக்கப்பட்டது. கடலில் மூழ்கி மாயமான ராமச்சந்திரனின் உடலை இலங்கை கடற்படையினர் தீவிரமாக தேடி வருகின்றனர்.
