திண்டுக்கல் அருகே கொலை வழக்கில் தேடப்பட்டு வந்த ரவுடி, காவலரை அரிவாளால் வெட்டிவிட்டு தப்பிச் செல்ல முயன்ற போது துப்பாக்கியால் சுட்டு பிடித்ததாக போலீசார் தெரிவித்துள்ளனர்.
திண்டுக்கல் பேருந்து நிலையம் அருகே கடந்த வாரம் ரவுடி இர்ஃபான் படுகொலை செய்யப்பட்ட வழக்கில் முத்தழகு பட்டியைச் சேர்ந்த ரிச்சர்ட் சர்ச்சின், எடிசன் சக்கரவர்த்தி, மார்ட்டின் நித்திஷ், பிரவீன் லாரன்ஸ் ஆகியோரை போலீசார் கைது செய்தனர்.
அவர்கள் பயன்படுத்திய ஆயுதங்கள் மற்றும் படுகொலை சம்பவத்தின் போது அணிந்திருந்த உடைகள் ஆகியவற்றை கைப்பற்றுவதற்காக ரிச்சர்ட் சச்சினை, போலீசார் மாலப்பட்டி மயான பகுதிக்கு அழைத்துச் சென்றனர்.
அங்கு மறைத்து வைத்திருந்த அரிவாளை எடுத்து ரிச்சர்ட் சச்சின், காவலர் அருண் பிரசாதின் இடது கையில் வெட்டி விட்டு தப்பி ஓட முயன்றதாகவும், அப்பொழுது ஆய்வாளர் வெங்கடாசலபதி தனது துப்பாக்கியால் ரிச்சர்ட் சச்சினின் வலது காலில் சுட்டு பிடித்ததாக காவல்துறையினர் தெரிவித்துள்ளனர்.
இதில் பலத்த காயம் அடைந்த ரிச்சர்ட் சச்சின் திண்டுக்கல் அரசு மருத்துவக் கல்லூரி மருத்துவமனையில் சிகிச்சைக்காக சேர்க்கப்பட்டார். காவலர் அருண் பிரசாத்தும் மருத்துவமனையில் அனுமதிக்கப்பட்டுள்ளார். இதனைதொடர்ந்து மருத்துவமனைக்கு சென்ற மாவட்ட காவல்கண்காணிப்பாளர் பிரதீப், காவலருக்கு ஆறுதல் கூறினார்.
