சென்னையில் பெய்த தொடர் கனமழை காரணமாக அடுக்குமாடி குடியிருப்பின் சுற்றுச்சுவர் உள்வாங்கியது.
சென்னையின் பல்வேறு பகுதிகளில் கனமழை பெய்தது. இதனால் சாலைகள், குடியிருப்பு பகுதிகள் வெள்ள நீரால் சூழப்பட்டது. இந்த நிலையில், அமைந்தகரை நெல்சன் மாணிக்கம் சாலையில் உள்ள தனியார் அடுக்குமாடி சுற்றுச்சுவர் 150 அடி நீளத்திற்கு, சில அடி ஆழத்திற்கு விரிசல் விட்டு உள்வாங்கியுள்ளது.
மேலும் அடுக்குமாடி குடியிருப்பில் உள்ள வீடுகளின் சுவர்கள் முழுவதும் விரிசல் அடைந்துள்ளது. இதனால் அந்த அடுக்குமாடி குடியிருப்பில் வசிக்கும் 200-க்கும் மேற்பட்ட குடும்பத்தினர் அச்சம் அடைந்துள்ளனர். மேலும், இந்த பகுதிக்கு அருகில் அடுக்குமாடி உணவகம் ஒன்று ராட்சத இயந்திரங்கள் கொண்டு கட்டப்பட்டு வருவது குறிப்பிடத்தக்கது.
