தீபாவளி விடுமுறை முடிந்து சென்னையை நோக்கி மக்கள் படையெடுத்த நிலையில், பரனூர் சுங்கச்சாவடியில் சுமார் 2 கிலோ மீட்டர் தொலைவிற்கு கடும் போக்குவரத்து நெரிசல் ஏற்பட்டது.
தீபாவளி பண்டிகை மற்றும் வார விடுமுறை நாட்களை ஒட்டி கடந்த புதன்கிழமை முதல் ஏராளமான மக்கள் சென்னையில் இருந்து சொந்த ஊர்களுக்கு புறப்பட்டுச் சென்றனர்.
இந்த நிலையில், விடுமுறை நேற்றுடன் முடிவடைந்த நிலையில் சொந்த ஊர்களில் இருந்து இருசக்கர வாகனங்கள், கார்கள், அரசு மற்றும் தனியார் பேருந்துகள் மூலம் பொதுமக்கள் சென்னையை நோக்கி படையெடுத்து வருகின்றனர்.
இதனால் ஏராளமான வாகனங்கள் அணிவகுத்து நின்றதால் பரனூர் சுங்கச்சாவடியில் சுமார் 2 கிலோ மீட்டர் தொலைவிற்கு போக்குவரத்து நெரிசல் ஏற்பட்டது. வாகனங்கள் ஒவ்வொன்றாக ஊர்ந்து சென்றதன் காரணமாக பொதுமக்கள் கடும் அவதிக்குள்ளாகினர்.
