குடியரசு துணை தலைவர் தேர்தலில் 68 வேட்புமனுக்களில் 66 வேட்பு மனுக்கள் நிராகரிக்கப்பட்டுள்ளன.
குடியரசு துணை தலைவருக்கான 17-வது தேர்தல் செப்டம்பர் 9ம் தேதி டெல்லியில் நடைபெறுகிறது. அதற்கான வேட்பு மனு தாக்கல் நிறைவடைந்த நிலையில், வேட்பு மனுக்கள் மீதான பரிசீலனை டெல்லியில் நடைபெற்றது.
அப்போது குடியரசுத் துணைத் தலைவர் தேர்தலில் போட்டியிட மொத்தம் 46 பேர் 68 வேட்பு மனுக்களை தாக்கல் செய்திருந்த நிலையில், அதில் 19 பேரின் 28 வேட்பு மனுக்கள் தேர்தல் சட்டத்தின் கீழ் தொடக்கத்திலே நிராகரிக்கப்பட்டது.
இறுதியில் 27 வேட்பாளர்கள் தாக்கல் செய்திருந்த 40 வேட்பு மனுக்கள் மீதான பரிசீலனை மட்டும் தேர்தல் அதிகாரி தலைமையில் நடைபெற்ற நிலையில் 25 வேட்பாளர்களின் வேட்பு மனுக்கள் நிராகரிக்கப்பட்டது.
இறுதியில் தேசிய ஜனநாயக கூட்டணி சார்பில் போட்டியிடும் சி.பி ராதாகிருஷ்ணன் மற்றும் இண்டி கூட்டணி சார்பில் போட்டியிடும் பி.சுதர்ஷன் ரெட்டியின் மனுக்கள் மட்டும் ஏற்றுக் கொள்ளப்பட்டதாக அறிவிக்கப்பட்டுள்ளது.
வேட்பு மனுக்களை திரும்ப பெறுவதற்கு வரும் 25ம் தேதி கடைசி நாள் என்பதால், அன்று மாலைக்குப் பிறகு இறுதி வேட்பாளர் பட்டியலை தேர்தல் அதிகாரிகள் வெளியிடுவார்கள் என எதிர்பார்க்கப்படுகிறது.
